Dövlət vətəndaşlara 16,9 milyard manat ayırdı– Deputat AÇIQLADI
“2025-ci ildə Azərbaycan dövlət büdcəsindən sosial sahəyə 16,9 milyard manat vəsait ayrılır. Adambaşına düşən sosial xərclərin həcmi isə min dollara yaxınlaşır”.
TodayPress TV xəbər verir ki, bunu Milli Məclisin deputatı Vüqar Bayramov deyib.
Deputatın sözlərinə görə, bu ilin avqustunda Vaşinqtonda Azərbaycan və Ermənistan arasında imzalanan sülh anlaşması regionun inkişafı üçün yeni imkanlar açır və sosial təminat tədbirlərinin daha da genişləndirilməsi üçün maliyyə bazasını gücləndirəcək:
“Saziş regionda sabitlik və əməkdaşlıq mühitini möhkəmləndirməklə yanaşı, sosial proqramların daha səmərəli icrası üçün də əlavə imkanlar yaradır. Artıq sosial təminat tədbirlərinə ayrılan vəsaitlərin artırılması sosial rifahın davamlı yüksəlişinə şərait yaradır”.
Vüqar Bayramov qeyd edib ki, artıq aktiv sosial proqramlardan geniş əhali qrupları faydalanır:
“Hazırda ünvanlı sosial yardımdan 83 min ailə — yəni 353 min ailə üzvü — yararlanır. 600 mindən çox uşaq aktiv sosial proqramlarla dəstəklənir, 150 mindən çox uşaq isə birbaşa sosial müavinətlərdən faydalanır”.
Parlamentari sonda vurğulayıb ki, Azərbaycanın artan maliyyə imkanları insan kapitalının inkişafı üçün daha geniş imkanlar yaradır.
Qiymət Mahir
