Şəhərlərdə piyada təhlükəsizliyinin açarı: Küçələr necə dizayn olunmalıdır?
Şəhərlərdə piyada vurulmalarının qarşısını almaq üçün küçələrin düzgün dizaynı əsas həll yolu hesab olunur.
TodayPress TV xəbər verir ki, bu barədə nəqliyyat eksperti Rauf Ağamirzəyev danışıb.
Onun sözlərinə görə, şəhər küçələri sürətli avtomobil hərəkəti üçün deyil, insan yönümlü şəkildə planlaşdırılmalıdır:
"Şəhərdə piyada təhlükəsizliyini təmin etmək üçün tədbirlər kompleks şəkildə tətbiq olunmalıdır. Səki davamlılığı təmin edilməli, yəni səkilər kəsilməməli və piyadaları yol hissəsinə çıxmağa məcbur edən maneələr aradan qaldırılmalıdır. Piyada keçidlərinin sayı və keyfiyyəti də təhlükəsizlik baxımından həlledicidir. Eyni səviyyəli və svetoforla nizamlanan keçidlər artırılmalıdır. Qısa və rahat keçidlər piyadanı riskli davranışdan çəkindirir. Bundan əlavə, iki və daha çox zolaqlı küçələrdə təhlükəsizlik adacıqları qurulmalıdır ki, piyadalar yolu mərhələli şəkildə keçə bilsin".
Gecə təhlükəsizliyi məsələsinə də toxunan ekspert bildirib:
"Keçidlər kontrast işıqlandırılmalıdır. Gecə vaxtı görünürlük artırılmadan təhlükəsizliyi təmin etmək mümkün deyil. Həmçinin, keçidlərə yaxın ərazilərdə ‘kor zonalar’ aradan qaldırılmalı, parkinq fiziki olaraq ayrılmalıdır ki, sürücü piyadanı əvvəlcədən görə bilsin. Dayanacaqlarda ‘anti-cib’ (bus bulb) həlləri tətbiq olunmalıdır. Bu yanaşma həm ictimai nəqliyyatın hərəkətini sürətləndirir, həm də parkinqlə toqquşma riskini azaldır".
Mütəxəssis vurğulayıb ki, həssas ərazilərdə sürətin azaldılması üçün fiziki tədbirlər vacibdir:
"Bağça, məktəb, poliklinika və xəstəxana önündə sürət fiziki olaraq azaldılmalıdır. ‘Berlin yastığı’ kimi elementlər bu baxımdan effektivdir. Kamera və cərimələr problemi tam həll etmir. Əsas həll küçələrin elə dizayn edilməsidir ki, sürətli hərəkət fiziki olaraq mümkün olmasın".
O, həmçinin avtomobil nəqliyyatı sektorunun iqtisadi roluna da toxunub. Onun təqdim etdiyi rəqəmlərə görə, son 3 ildə yük avtomobillərinin sayı 3 000-dən 14 500-ə yüksəlib, daşıyıcı şirkətlərin sayı 2 000, taksilərin sayı 25 000, Bakıda avtobusların sayı isə 2 350-dir.
"Bu göstəricilər minimum 44 200 sürücü deməkdir və bu, yalnız birbaşa məşğulluqdur. Lakin nəqliyyat sektoru multiplikativ effekt yaradan sahələrdəndir. Servis və texniki xidmət, yanacaq və enerji sektoru, sığorta və maliyyə xidmətləri, logistika və anbarlama, eləcə də rəqəmsal platformalar bu sahə ilə birbaşa bağlıdır. Yəni real təsir on minlərlə əlavə iş yeri və geniş iqtisadi dövriyyə deməkdir".
Rauf Ağamirzəyev qeyd edib ki, avtomobil nəqliyyatı yalnız daşınma vasitəsi deyil, böyük iqtisadi ekosistemdir. Bu sektorun düzgün tənzimlənməsi və planlanması həm məşğulluğa, həm də şəhər iqtisadiyyatına ciddi təsir edir.
Türkan İsgəndərli
