Qiymətləndirmə sektorunda yeniliklər media nümayəndələrinə təqdim olundu

Azərbaycan Qiymətləndiricilər Cəmiyyəti (AQC) 22 İyul – Milli Mətbuat Günü münasibətilə media nümayəndələri üçün tədbir təşkil edib.

TodayPress TV xəbər verir ki, tədbirdə AQC-nin İdarə Heyətinin sədri Vüqar Oruc, sədrin müşaviri Asif İbrahimov, Tikinti, Abadlıq və Köçürülmə Komissiyasının sədri Elnur Fərzəliyev, Daşınmaz Əmlak üzrə koordinator Şaiq Əliyev, İctimaiyyətlə Əlaqələr Departamentinin rəhbəri Orxan Əli, sədrin köməkçisi Ziya Mustafayev, eləcə də ölkənin müxtəlif media qurumlarını təmsil edən 50-yə yaxın jurnalist iştirak edib.

Görüşdə media ilə qiymətləndirmə sektoru arasında əməkdaşlığın inkişafı, ictimaiyyətin düzgün və operativ məlumatlandırılmasının əhəmiyyəti, həmçinin qarşılıqlı əlaqələrin genişləndirilməsi istiqamətində fikir mübadiləsi aparılıb.

Tədbirdə çıxış edən Azərbaycan Qiymətləndiricilər Cəmiyyətinin İdarə Heyətinin sədri Vüqar Oruc Milli Mətbuat Günü münasibətilə jurnalistləri təbrik edərək onların cəmiyyətin obyektiv məlumatlandırılması, şəffaflığın təmin olunması və ictimai rəyin formalaşdırılmasında mühüm rol oynadıqlarını vurğulayıb.

O bildirib ki, media ilə səmərəli əməkdaşlıq dövlət, biznes və cəmiyyət arasında etibarlı informasiya mühitinin formalaşmasına xidmət edir. V.Oruc qeyd edib ki, AQC-nin fəaliyyəti, qiymətləndirmə sahəsində həyata keçirilən islahatlar və tətbiq olunan yeniliklərin geniş ictimaiyyətə çatdırılmasında media nümayəndələrinin rolu xüsusi əhəmiyyət daşıyır. Onun sözlərinə görə, bu istiqamətdə qarşılıqlı əməkdaşlıq gələcəkdə də davam etdiriləcək.

Görüş çərçivəsində jurnalistləri maraqlandıran suallar cavablandırılıb, qiymətləndirmə sahəsində aktual məsələlər və gələcək birgə əməkdaşlıq perspektivləri müzakirə olunub.

Sonda Azərbaycan Qiymətləndiricilər Cəmiyyəti ilə səmərəli əməkdaşlıq edən bir qrup media nümayəndəsi peşəkar fəaliyyətlərinə və qiymətləndirmə sahəsində ictimai məlumatlandırmaya verdikləri töhfəyə görə AQC-nin təşəkkürnamələri ilə təltif olunub.