İctimai yerlərdə heyvan kəsimi: Uşaqlar təhlükə altında
İctimai yerlərdə mal-qara kəsib başlarını asırlar, və bu mənzərə həm böyüklərin, həm də uşaqların gözü önündə baş verir. Belə hallar uşaqlara necə təsir edir?
Mövzu ilə bağlı TodayPress TV-yə danışan psixoloq Zeynəb Əyyubova bildirib ki, uşaqların psixoloji inkişafı nəzərə alındıqda, bu cür görüntülər onların emosional dünyasına mənfi təsir göstərə bilər.
Onun sözlərinə görə, uşaqların psixikası hələ tam formalaşmadığı üçün onlar gördükləri hadisələri böyüklər kimi analiz edə bilmirlər:
"İctimai yerlərdə heyvan kəsimi, qan görüntüləri və heyvan başlarının asılması uşaqlarda qorxu, narahatlıq, təşviş, hətta yuxu pozuntuları yarada bilər. Bəzi hallarda isə uşaqlarda aqressiv davranışların artması və zorakılığa qarşı həssaslığın azalması müşahidə oluna bilər. Xüsusilə kiçik yaşlı uşaqlar bu görüntüləri travmatik hadisə kimi qəbul edə bilərlər. Bu isə onların emosional təhlükəsizlik hissini zəiflədə, uzun müddətli psixoloji gərginliyə səbəb ola bilər".
Psixoloq vurğulayıb ki, azyaşlıların bu cür görüntülərlə tez-tez qarşılaşması empati hissinin azalmasına və zorakılığı normallaşdırmağa gətirib çıxara bilər:
"Valideynlər bu hallarda uşaqları mümkün qədər bu cür görüntülərdən uzaq tutmağa çalışmalıdırlar. Əgər uşaq artıq belə bir vəziyyətə şahid olubsa, valideyn onunla sakit və anlayışlı şəkildə danışmalı, qorxularını dinləməli və hisslərini ifadə etməsinə şərait yaratmalıdır. Uşağın qorxusunu kiçiltmək və ya “bu normaldır” kimi ifadələr işlətmək tövsiyə olunmur. Əksinə, uşağın hisslərini qəbul etmək və ona emosional dəstək göstərmək vacibdir".
Mütəxəssis əlavə edib ki, cəmiyyət olaraq da bu məsələyə həssas yanaşmaq lazımdır. Onun sözlərinə görə, heyvan kəsimi sanitariya və etik qaydalara uyğun, uşaqların görmədiyi qapalı məkanlarda həyata keçirilməlidir.
"İctimai yerlərdə bu cür görüntülərin nümayiş etdirilməsi uşaqların psixoloji sağlamlığı baxımından uyğun deyil. Unutmayaq ki, uşaqlar gördükləri mühitdə böyüyürlər. Onların sağlam psixoloji inkişafı üçün təhlükəsiz, sakit və travmadan uzaq mühit yaratmaq həm valideynlərin, həm də cəmiyyətin ortaq məsuliyyətidir", - deyə Zeynəb Əyyubova fikrini tamamlayıb.
Türkan İsgəndərli
