Binəqədidə sakinlər pis vəziyyətdə: “Su xətti partlayıb, evimiz bataqlığa çevrilib”
Paytaxtın Binəqədi rayonunda su xəttində baş verdiyi bildirilən qəza sakinlərin ciddi narahatlığına səbəb olub.
TodayPress TV redaksiyasına müraciət edən sakinlər aidiyyəti qurumlara dəfələrlə müraciət etsələr də, problemin hələ də həll olunmadığını bildirirlər.
Hadisə Binəqədi rayonu, Birinci Mədən qəsəbəsi, Aşırım küçəsində, Vulkan dağının yaxınlığında qeydə alınıb.
Şikayətçi bildirib ki, evlərinin üzərindən keçən kiçik su xəttində qəza baş verib və nəticədə əraziyə böyük həcmdə su axmağa başlayıb.
"Bizim evin üstündən kiçik bir su xətti keçir. Həmin xətt və şlanqlar partlayıb. Nə qədər müraciət etsək də, nəticə yoxdur. Rəsmi ərizə ilə də müraciət etmişik, amma gəlib baxan olmayıb".
Sakinin sözlərinə görə, hadisədən sonra yalnız bir əməkdaş əraziyə baxış keçirib, lakin görülən tədbirlər problemi aradan qaldırmayıb.
"Sadəcə bir işçi gəlib xəttə baxdı, müəyyən müdaxilə etdi, amma su sızması əvvəlki kimi davam edir. Bütün evimizin ətrafı bataqlığa çevrilib. Məsələ ilə bağlı dəfələrlə aidiyyəti qurumlara müraciət olunub. Su İdarəsinə müraciət etmişik. Ayın 8-də Azərsuya ərizə ilə müraciət etmişəm. Həmçinin 20 Yanvar ərazisindəki Azərbaycan Dövlət Su Ehtiyatları Agentliyinə də (ADSEA) dəfələrlə getmişəm. Dünən artıq dördüncü dəfə müraciət etdim. Amma hər dəfə sadəcə "baxılacaq" deyib məni yola salırlar".
Şikayətçinin sözlərinə görə, Binəqədi Rayon İcra Hakimiyyətinin nümayəndələri də əraziyə baxış keçiriblər. Lakin problemin onların səlahiyyətlərinə aid olmadığını bildirərək hər hansı tədbir görməyiblər.
Nəticədə isə su fasiləsiz axıb gedir. Yolun hər tərəfi, ətraf ərazilər su içindədir. Evin alt hissəsi və zirzəmisi tamamilə su ilə dolub.
Müraciətdə qeyd olunur ki, suyun davamlı şəkildə axması artıq təkcə narahatlıq deyil, həm də yaşayış evi üçün ciddi təhlükə yaradır.
"Evə və yola suyun sızması ciddi problemdir. Xüsusilə zirzəminin su ilə dolması evin bünövrəsinə ziyan vurur və gələcəkdə daha böyük təhlükələr yarada bilər. Aidiyyəti qurumlara dəfələrlə edilən müraciətlərə baxmayaraq, problemin həll olunmaması sakinlərdə ciddi narahatlıq yaradır"
Məsələ ilə bağlı aidiyyəti qurumlara sorğu göndərilib, mövqeyini dərc etməyə hazırıq.
Türkan İsgəndərli
ФОТО
