Elmə məlum olmayan canlılar aşkarlandı
Şərqi Afrikaya təşkil olunan ekspedisiya zamanı 16 nəfərlik beynəlxalq alimlər qrupu elmə məlum olmayan onlarla heyvan və həşərat növü aşkar edib.
TodayPress TV xəbər verir ki, bu barədə "CNN" məlumat yayıb.
Tədqiqatçılar Anqolanın Lisima yaylasında araşdırmalar aparıblar. Uzun illər əlçatmaz qalan bu əraziyə giriş ölkədə 27 il davam edən və 2002-ci ildə başa çatan vətəndaş müharibəsi səbəbindən məhdud olub.
Ekspedisiya zamanı alimlər ultrabənövşəyi işıq altında parıldayan tacvari xərçəng hörümçəyi, zəhərli xaç böcəyini təqlid edən çarpaz hörümçək, səkkiz yeni kəpənək növü, yarasa qanı ilə qidalanan uçuşsuz milçək və zirehli cırcırama aşkar ediblər.
Mütəxəssislərin sözlərinə görə, məhdud yaşayış mühitinə malik olan və xüsusi ekoloji şərait tələb edən növlər iqlim və ətraf mühit dəyişikliklərinə qarşı daha həssasdır.
Qeyd edək ki, ötən il Ural Federal Universiteti və Çinin Taizhou Universitetinin alimləri də Çində əvvəllər məlum olmayan yeni şibyə növlərini müəyyən etmişdilər. Bunun üçün tədqiqatçılar yüz il əvvəl toplanmış nümunələrin əvəzinə həmin ərazilərdən yeni materiallar toplayaraq müasir analiz üsullarından istifadə ediblər.
Türkan İsgəndərli
