Dövlət qurumları İT rəhbərlərinin VI Zirvə Toplantısı keçirildi
Dövlət qurumlarının informasiya təhlükəsizliyi üzrə rəhbər heyəti arasında təcrübə mübadiləsi, sahə üzrə problemlərin və yeni imkanların müzakirəsi məqsədilə Xüsusi Rabitə və İnformasiya Təhlükəsizliyi Dövlət Xidməti (XRİTDX) tərəfindən “Dövlət qurumları İT rəhbərlərinin VI Zirvə Toplantısı” təşkil olunub.
TodayPress TV xəbər verir ki, tədbirə 70-dən çox dövlət qurumunu təmsil edən nümayəndələr qatılıb.
Zirvə Toplantısını açan XRİTDX-in rəis müavini, general-mayor Allahverən İsmayılov qonaqları salamlayaqag, çıxışında vurğulayıb ki, informasiya təhlükəsizliyi artıq yalnız texniki məsələ deyil, milli təhlükəsizlik, iqtisadi sabitlik və cəmiyyətin etimad məsələsidir. Rəqəmsallaşmanın dərinləşməsi ilə bağlı risklərin artdığını qeyd edən A. İsmayılov bildirib ki, qlobal statistikalara əsasən, 2024-cü ilin ilk yarısında dövlət qurumlarına yönəlmiş hücumların 40%-dən çoxu kritik infrastruktura qarşı həyata keçirilib. O, həmçinin ölkəmizdə həyata keçirilmiş ilk “Bug Bounty” proqramının əhəmiyyətini qeyd edərək, dövlət qurumlarının özəl sektorla əməkdaşlığın vacibliyini vurğulayıb. Eləcə də, Xidmət rəisinin müavini 9-10 oktyabr tarixlərində Bakı Konqress Mərkəzində keçiriləcək “CIDC-2025 - Ağıllı şəhərlərdə kibermüharibə” tədbirinə dəvət edib və beynəlxalq əməkdaşlığa göstərilən dəstəyə görə Avropa Birliyinə və Estoniyanın Elektron İdarəçilik Akademiyası Fonduna təşəkkürünü bildirib.
Daha sonra, Elektron İdarəçilik Akademiyası Fondunun kibertəhlükəsizlik üzrə baş mütəxəssisi Elza Neeme və “Şərq Tərəfdaşlığı ölkələrinə kiberdavamlılığın gücləndirilməsi” layihəsinin Azərbaycan üzrə koordinatoru Klaid Magi beynəlxalq təcrübə mübadiləsinin əhəmiyyətini qonaqların diqqətinə çatdırıbla
Tədbirin davamında XRİTDX-in baş idarə rəisinin müavini Tural Məmmədov “Dövlət qurumlarında informasiya təhlükəsizliyinin vəziyyəti ilə bağlı statistik göstəricilər, ağıllı şəhərlərdə kibermüharibə, yeniliklər və planlar” mövzularında çıxış edib. Eləcə də, T. Məmmədov və yerli kibertəhlükəsizlik startapı “Qarabug”-ın təsisçisi Miraqşın Abutalıbov ilk dəfə olaraq dövlət informasiya ehtiyatlarında həyata keçirilmiş “Bug Bounty” proqramının nəticələri açıqlayıblar.
Eləcə də, Ekologiya və Təbii Sərvətlər Nazirinin müşaviri Rüstəm Həsənov “Dövlət qurumları üçün açıq qaynaq kodlu həllərin perspektivləri” mövzusunda çıxış edib.
Sonda sahə üzrə dövlət qulluqçularının əməyinin stimullaşdırılması, kiberinsident nümunələri, yeni tendensiyalar, təhlükələr və dövlət qurumlarının üzləşdiyi problemlər müzakirə olunub. Açıq debat iştirakçılara bir-birindən təcrübə öyrənmək və birgə həll yolları təklif etmək imkanı yaradıb.
“Dövlət qurumları İT rəhbərlərinin Zirvə Toplantısı” informasiya təhlükəsizliyi sahəsində dövlət qurumları arasında əməkdaşlığın gücləndirilməsi, yeniliklərin müzakirəsi və gələcək fəaliyyət planlarının müəyyənləşdirilməsi baxımından mühüm platforma rolunu oynayır.
