"ChatGPT"yə valideyn nəzarəti funksiyası əlavə ediləcək

Amerikalı texnologiya şirkəti "OpenAI", süni intellekt əsasında fəaliyyət göstərən "ChatGPT" çat-botuna valideyn nəzarəti funksiyası əlavə etməyi planlaşdırır. 

TodayPress TV xəbər verir ki, bu barədə şirkət məlumat yayıb. 

Bu qərar, 16 yaşlı bir yeniyetmənin intihar etməzdən əvvəl çat-botla özünü öldürmək barədə yazışdığı və bu məsələdə "ChatGPT"nin dolayı təsirə malik olduğu iddiaları fonunda verilib.

Şirkətin rəsmi saytında yayılan açıqlamada bildirilir:

“Tezliklə "ChatGPT"yə valideyn nəzarəti funksiyası əlavə edəcəyik. Bu imkan valideynlərə övladlarının çat-botdan necə istifadə etdikləri barədə daha çox məlumat əldə etməyə şərait yaradacaq”.

Bununla yanaşı, istifadəçilər çat-botla təmas zamanı etibarlı hesab etdikləri şəxsin kontaktını da əlavə edə biləcəklər. Bu funksiya fövqəladə hallarda birbaşa yardım çağırışına imkan verəcək. İstifadəçilər, həmçinin, təcili yardım xidmətlərini tək bir kliklə çağırmaq funksiyasından da yararlana biləcəklər.

"OpenAI" qeyd edib ki, "ChatGPT"də istifadəçini təhlükəli addımlardan çəkindirmək üçün xüsusi alqoritmlər tətbiq olunub. Lakin şirkət etiraf edir ki, uzun müddətli yazışmalar zamanı çat-botun cavabları qeyri-dəqiq və ya uyğun olmayan məzmun daşıya bilər.

Şirkət bu kontekstdə həm texniki təkmilləşdirmə, həm də etik məsuliyyət çərçivəsində tədbirlər görəcəyini bildirir.

Aysel Mətləb