"Apple" "iPhone"dan "iTorrent" tətbiqini blokladı

"Apple" korporasiyası "iPhone" cihazlarında məşhur torrent-treker "iTorrent" tətbiqini bloklayıb.

TodayPress TV xəbər verir ki, bu barədə “TorrentFreak” nəşri məlumat yayıb.

Torrent texnologiyası fayl mübadiləsi üçün istifadə olunsa da, "Apple" ənənəvi olaraq bu protokolu öz cihazlarında qadağan etmişdi.

Alternativ "App Store" platformaları açıldıqdan sonra "iTorrent iPhone"lara yüklənə bilsə də, avqustun sonunda tətbiq “AltStore PAL” mağazasından silinib.

Tətbiqin yaradıcısı Daniil Vinogradov bildirib ki, "Apple" gözlənilmədən onun hesabını bağlayaraq proqramı bloklayıb. O, şirkətin dəstək xidmətinə müraciət etsə də, cavab ala bilməyib. “AltStore PAL”ın həmtəsisçisi Şeyn Gill isə "Apple" ilə danışıqların aparıldığını, lakin əlavə məlumat verilmədiyini deyib.

"Apple" isə mediaya açıqlamasında, "iTorrent"in bloklanmasının “müxtəlif yurisdiksiyalarda mövcud sanksiya qaydalarına əməl etmək məqsədilə” həyata keçirildiyini və bu barədə tətbiq yaradıcısına məlumat verildiyini bildirib.

Qiymət Mahir