Sanksiyalar paketinə VETO: Avropa Birliyində nə baş verir?
"Macarıstan və Slovakiyanın Avropa Birliyinin 20-ci sanksiyalar paketinə veto qoyması enerji və maliyyə maraqları fonunda ciddi siyasi müzakirələrə səbəb olub".
Politoloq Abutalıb Səmədov bunu TodayPress TV-yə danışarkən bildirib.
Onun sözlərinə görə, Macarıstan və Slovakiya bu addımı Ukraynanın öz ərazisindən keçən “Dostluq” neft kəməri vasitəsilə Rusiya neftinin Avropaya çatdırılmasına mane olması ilə əsaslandırır.
Analitik qeyd edib ki, bu kəmərin bağlanması həmin ölkələr üçün ciddi problem yaradır və onlar Ukraynadan neft tranzitinə mane olmamağı tələb edirlər:
“Əgər burada müəyyən razılıq əldə olunsa, 20-ci sanksiyalar paketinə qoyulan veto da götürülə bilər. Paket çərçivəsində Rusiya üçün əlavə ticarət məhdudiyyətləri, bank sektoruna qarşı yeni sanksiyalar, həmçinin Rusiya neftinin tankerlərlə daşınmasına dair məhdudiyyətlər nəzərdə tutulur".
BÜDCƏDƏ ÇƏTİNLİKLƏR YARANACAQ
Siyasi şərhçinin sözlərinə görə, Avropa Birliyi Rusiyanı xarici valyuta gəlirlərindən məhrum etməyə çalışır. Çünki Rusiyanın xarici ticarət gəlirlərinin mühüm hissəsi neft-qaz satışından formalaşır və bu gəlirlərin azalması büdcədə ciddi çətinliklər yaradır.
Səmədov hesab edir ki, Macarıstan və Slovakiyanın dövlət maraqları digər Avropa ölkələrinin maraqları ilə tam üst-üstə düşmür. Bununla belə, yaranmış vəziyyətdən çıxış yolunun danışıqlardan keçdiyini bildirir.
AVROPA BİRLİYİ PARÇALANIR?
Politoloqun fikrincə, qərarların qəbul proseduruna yenidən baxılması və bu kimi mühüm məsələlərdə konsensus tələbinin aradan qaldırılması gələcəkdə oxşar problemlərin qarşısını ala bilər.
"Ukraynaya ayrılması nəzərdə tutulan 90 milyardlıq kreditə veto qoyulması da olduqca ciddi hadisədir. İki il üçün nəzərdə tutulan bu məbləğ Ukraynanı qane etmir. Çünki əvvəlki dövrdə hər il təxminən 82 milyard dollar yardım ayrıldığı halda, indi iki ilə təxminən eyni həcmdə vəsait planlaşdırılıb. Bu vəsaitə də veto qoyulması Ukraynanın vəziyyətini daha da ağırlaşdıra bilər", - deyə siyasi analitik izah edib.
Aysel Mətləb
