Madurodan istefa bəyanatı: Karakas ABŞ-Rusiya arasında...
Venesuela Prezidenti Nikolas Maduro ABŞ-yə 18 ay sonra hakimiyyəti təhvil verməyə hazır olduğunu bildirib. Vaşinqton isə bunu kifayət hesab etmir və Maduronun dərhal istefa verməsini tələb edir. Maduronun təklifi ilə Vaşinqtonun dərhal dəyişiklik tələbi arasında yaranan uçurum tərəflərin real kompramisə getmədiyini göstərir.
Maraqlıdır, bu, Venesuelada gələcək siyasi dinamika hansı istiqamətdə irəliləyəcək?
Mövzu ilə bağlı TodayPress TV-yə danışan siyasi şərhçi Şakir Ağayev bildirib ki, ABŞ Venesuela Prezidentinin istefası və hakimiyyətin mümkün qədər tez təhvil verilməsi üçün müxtəlif addımlar atır.
Maduroya təzyiq üçün Venesuelanın hava məkanını bağlamağa hazırlaşır:
"ABŞ administrasiyası prosesin sürətləndirilməsi üçün radikal addımlar atmağa hazırlaşır. Tramp elan edib ki, yaxın müddətdə Venesuelanın hava məkanı bloklanacaq – ölkəyə uçuşlar dayandırılacaq, hava nəqliyyatı tam şəkildə iflic ediləcək. Bu addım Maduronun istefasını tezləşdirmək məqsədi daşıyır".
Onun sözlərinə görə, Maduro hazırda vaxt qazanır və mümkün müdaxiləyə qarşı güc qurumlarını hazırlayır:
"Maduro isə istefaya hazır olduğunu desə də, bunun üçün 1 il 8 ay vaxt istəyir. ABŞ isə bu müddəti qəbul etmir. Qərb mediasının yazdığına görə, Maduro bu möhlətlə vaxt qazanmağa çalışır və paralel şəkildə öz mövqeyini möhkəmləndirmək üçün addımlar atır. O, ölkədə hərbçilərə, xüsusi xidmət orqanlarına və hüquq-mühafizə strukturlarına göstəriş verib ki, ABŞ güc tətbiqi ilə onu devirməyə çalışarsa, ölkədə idarəetmənin tam şəkildə dağılması, parçalanma və qarşıdurmanın yaranması ehtimalına hazır olsunlar. Maduro beləliklə, mümkün müdaxilə sonrası ölkənin xaosa düçar ola biləcəyini qabardaraq prosesi çətinləşdirmək istəyir".
Analitik həmçinin vurğulayıb ki, ABŞ-nin Venesuelaya təzyiqlərini Tramp narkotrafiklə əlaqələndirsə də, beynəlxalq media bu izahı inandırıcı saymır. Əsas məqsədin Venesuelanın zəngin neft yataqları üzərində nəzarəti ələ keçirmək olduğu geniş şəkildə qeyd olunur.
Ş.Ağayev bildirib ki, Venesuela məsələsi ABŞ ilə Rusiya arasında siyasi bazarlığa çevrilə bilər:
"Bu məsələ eyni zamanda ABŞ və Rusiya arasında mümkün siyasi bazarlığın predmeti də ola bilər. Ssenari belə ola bilər: ABŞ Venesuelada istədiyi nəticəni əldə edir, Rusiya buna ciddi reaksiya vermir və bunun əvəzində Ukrayna məsələsində müəyyən güzəştlər əldə edir. Bu ehtimal hazırda ekspert dairələrində geniş müzakirə olunur".
O hesab edir ki, bütün hallarda baş verənlər Latın Amerikasında geosiyasi düzənin dəyişməsinə səbəb ola bilər. Həmçinin ABŞ-nin Karib hövzəsində, xüsusilə də Venesuela üzərindən iqtisadi, siyasi və strateji mövqelərini gücləndirməsi gözlənilir.
Jalə Rövşən
