Ermənistanın tranzit bəyanatı: İqtisadi çiçəklənməyə ümid...
“44 günlük Vətən müharibəsindən sonra Cənubi Qafqazda tamamilə yeni siyasi şərait yaranıb. Ermənistanın baş naziri bu reallığa uyğunlaşmağa və qonşuları ilə münasibətləri bərpa etməyə çalışır”.
Politoloq Azad Məsiyev Ermənistanın Baş naziri Nikol Paşinyanın “Türkiyədən Azərbaycana və Azərbaycandan Türkiyəyə yük maşınlarının Ermənistan ərazisindən tranzit keçidini təmin etməyə hazırıq” bəyanatını TodayPress TV-yə şərh edərkən bildirib.
O hesab edir ki, Ermənistanın gələcək taleyi birbaşa qonşu dövlətlərlə əlaqələrin normallaşmasından asılıdır.
“Paşinyanın yürütdüyü hazırkı siyasət Rusiya ilə münasibətlərin soyumasına səbəb olur ki, bu da bir çox analitiklərin fikrincə, Qərbdən gələn təlimatlarla bağlıdır.
Ermənistan dünya iqtisadiyyatına inteqrasiya etmək istəyirsə, nəqliyyat infrastrukturunu mütləq şəkildə açmalıdır. Bu, Ermənistana imkan verər ki, həm Azərbaycan üzərindən Orta Asiyaya çıxış əldə etsin, həm də Türkiyə vasitəsilə Avropaya inteqrasiya xəttini reallaşdırsın. Bu kontekstdə rəsmi İrəvan Türkiyə ilə sərhədlərin açılmasına və nəqliyyat kommunikasiyalarının bərpasına can atır”.
Politoloq xatırladıb ki, Prezidentin razılığı ilə Azərbaycan ərazisi vasitəsilə böyük həcmdə strateji yüklərin (Rusiya və Qazaxıstandan gələn taxılın) Ermənistana daşınmasına şərait yaradılıb:
“Eyni zamanda Azərbaycan yanacağının Ermənistan bazarında satılmasına icazə verilməsi rəsmi Bakının sülh missiyasına sadiqliyinin növbəti göstəricisidir. Buna adekvat olaraq, Ermənistanın baş naziri Azərbaycan və Türkiyəyə məxsus nəqliyyat vasitələrinin Ermənistan üzərindən tranzit keçidinə şərait yaratmağa çalışır. Bu addım həm ölkəyə iqtisadi dividendlər gətirə bilər, həm də qarşılıqlı etimadın bərpasına xidmət edər. Sərhədlərin açılması və infrastrukturun bərpası bu gün Ermənistana "hava və su" kimi lazımdır”.
A.Məsiyev hesab edir ki, regionun tam iqtisadi çiçəklənməsi üçün Zəngəzur dəhlizi mütləq şəkildə açılmalıdır:
“Bu dəhliz Azərbaycan və Türkiyə arasında ən qısa və səmərəli qurubatı yolunu (Naxçıvan üzərindən) təmin edəcək. Burada əsas məsələ yükdaşımaların və vətəndaşların təhlükəsizliyinə tam zəmanət verilməsi, həmçinin həm dəmir yolu, həm də avtomobil yollarının müasir standartlara cavab verəcək səviyyəyə gətirilməsidir. Bu istiqamətdə Ermənistan tərəfi hələ xeyli iş görməlidir”.
Ekspert yekun olaraq Paşinyanın bu çağırışlarının irəliyə doğru atılmış müsbət addımlar olduğunu, lakin real nəticələr üçün hələ görüləcək işlərin çox olduğunu vurğulayıb.
Jalə Rövşən
