Ermənistan–İran sərhədində yenilik gözlənilir – Proses başladı...
Ermənistan–Türkiyə sərhədində uzun illər davam edən Rusiya hərbi mövcudluğuna son qoyulub. 2025–2026-cı illərdə mərhələli şəkildə həyata keçirilən qərar nəticəsində Rusiya hərbçiləri sərhəd-keçid məntəqələrindən çıxarılıb və nəzarət tam şəkildə Ermənistanın Milli Təhlükəsizlik Xidmətinin Sərhəd Qoşunlarına verilib.
Proses ilk olaraq 2025-ci ilin yazında “Marqara” keçid məntəqəsində başlayıb, daha sonra “Axurik” məntəqəsində də eyni dəyişiklik baş tutub.
Bundan əvvəl isə Rusiya hərbçiləri Ermənistan–Türkiyə sərhəd xəttindən çıxarılmışdı. Beləliklə, Ermənistan müstəqillik dövründə ilk dəfə olaraq Türkiyə ilə sərhədin mühafizəsini tam şəkildə öz milli sərhəd xidmətinə həvalə etmiş oldu.
Maraqlıdır, bu prosesin növbəti mərhələsi Ermənistan–İran sərhədinə də şamil oluna bilərmi?
Çünki məhz bu xətt region üçün strateji əhəmiyyət daşıyır və burada Zəngəzur dəhlizinin taleyi ilə bağlı məsələlər gündəmdədir. Ermənistan Rusiyanın sərhəd qoşunlarının bu istiqamətdən çıxarılmasına nə vaxt nail ola bilər?
Sözügedən məsələni TodayPress TV-yə şərh edən Ədalət, Hüquq, Demokratiya Partiyasının (ƏHD) ictimai-siyasi əlaqələr üzrə katibi, politoloq Azər Qasımov bildirib ki, Ermənistanın tədricən özünü dövlət kimi aparması prosesinə başladığı görünür.
Onun sözlərinə görə, Türkiyə sərhədinin Rusiya hərbçilərindən alınıb Ermənistanın müvafiq qurumlarına tapşırılması ilə bağlı xəbərlər ötən ildən yayılmağa başlamışdı və Rusiya tərəfi də bunu qəbul etmişdi:
“Ermənistanla Türkiyə arasında ciddi problemlərin olmaması gerçəyi də bu prosesə start verib. Türkiyə də həmişə Ermənistanla əlaqələrin inkişafında maraqlı olub. Bu, əslində, siyasi addım kimi çox vacib məsələdir. İlk növbədə Ermənistan öz sərhədlərini qorumaq iqtidarında olduğunu göstərir və bununla da gələcəkdə İranla olan sərhədini də özü qoruya biləcəyini sübut etmiş olur. Bundan başqa, Ermənistan bütün normal ölkələr kimi öz dövlət sərhədlərini özü qorumalıdır”.
Politoloq qeyd edib ki, Ermənistan–İran sərhədindən Rusiyanın sərhəd qoşunlarının çıxarılması məsələsi də iqtisadi olduğu qədər siyasi, hətta geosiyasi məsələdir.
“Hesab edirəm ki, bu proses artıq başlayıb. "Tramp Marşrutu" ( TRIPP) layihəsi hazır olana qədər bu məsələ öz həllini tapacaq. Regionda davam edən proseslər fonunda bu məsələ sürətlənə və ya zəifləyə bilər. Eyni zamanda Rusiyanın Ukraynadan hansı vəziyyətdə ayrılacağı da mühüm amildir. Bu baxımdan görünən odur ki, geosiyasi vəziyyətin necə formalaşacağından asılı olaraq regionda çox ciddi proseslər gözlənilir və bu proseslər bütün planları dəyişə bilər”, - deyə analitik fikrini yekunlaşdırıb.
Qiymət Mahir
