Rəsmi Bakıdan SƏRT CAVAB: Aİ–Azərbaycan dialoqunda yeni gərginlik?
“2 dekabr 2025-ci ildə Avropa İttifaqı–Ermənistan Tərəfdaşlıq Şurasının qəbul etdiyi “Avropa İttifaqı–Ermənistan Strateji Gündəliyi” sənədi region üçün mühüm siyasi siqnaldır və onun tərkibində Azərbaycanın maraqlarına zidd elementlərin yer alması sülh prosesinə müəyyən mənfi təsir göstərə bilər”.
Politoloq Anar İsayev bunu TodayPress TV-yə açıqlamasında deyib.
O bildirib ki, bu, Avropa İttifaqının (Aİ) regional balanssız mövqeyi görüntüsü yarada bilər:
“Belə ki, sənəddə post-münaqişə reallıqlarının təhrif edilməsi və birtərəfli vurğular Aİ-nin Ermənistana daha yaxın siyasi-strateji kursa keçid etdiyini, həmçinin Azərbaycan–Ermənistan məsələsində neytrallıqdan uzaqlaşdığı təəssüratını gücləndirir. Bu isə Bakı üçün Aİ-nin vasitəçilik rolunu zəiflədə bilər. Azərbaycan indiyədək Aİ-ni neytral aktor kimi qəbul edirdi, amma sənəddəki vurğular bu rolu sual altına qoya, Ermənistanı danışıqlarda daha sərt mövqeyə həvəsləndirə bilər.
Sənəd Aİ-nin Ermənistana təhlükəsizlik dəstəyi, islahatlar, iqtisadi yaxınlaşma, ümumi təhlükəsizlik və müdafiə siyasəti sahəsində genişləndirilmiş əməkdaşlıq vədi verir. Bu paralel dəstək Ermənistanın sülh danışıqlarında xüsusi tələblərinin artmasına, 2020–2023 reallıqlarını tam qəbul etməməsinə, sərhəd məsələləri və kommunikasiyalar üzrə irəliləyişi ləngitməsinə səbəb ola bilər”.
Ekspert belə sənədlərin Aİ–Azərbaycan dialoqunda yeni gərginlik yarada biləcəyini və Bakının da buna cavab olaraq bir sıra mümkün addımlar ata biləcəyini deyib:
“Belə ki, Aİ ilə yüksək səviyyəli dialoqu müvəqqəti zəiflətmək, enerji, nəqliyyat və təhlükəsizlik sahələrində Aİ-nin rolunu məhdudlaşdırmaq, regionda özünə daha uyğun hesab etdiyi formatlara istiqamətlənmək kimi addımlar istisna deyil. Bu isə sülh prosesində Qərbin rolunu azalda bilər. Bütün bu sadaladığım səbəblərə baxmayaraq, bir vacib məqamı qeyd edim ki, Aİ–Ermənistan sənədi hər nə qədər birtərəfli olsa da, Azərbaycan–Ermənistan sülhünün həlledici şərtləri Aİ deyil, 8 avqust 2025-ci il tarixində Vaşinqtonda paraflanmış sülh sazişinə əsasən Bakı və İrəvanın öz razılığıdır. Reallıqda sərhəd delimitasiyası, kommunikasiyaların açılması, sülh sazişi mətninin yekunlaşdırılması hələ də iki ölkə arasında gedən birbaşa proseslərlə həll edilir. Aİ-nin sənədi bu prosesi çətinləşdirə bilər, amma onun nəticəni tam bloklamaq gücü yoxdur”.
Bildirilib ki, 2 dekabr 2025-ci il tarixində Brüssel şəhərində keçirilmiş Avropa İttifaqı (Aİ) və Ermənistan arasında Tərəfdaşlıq Şurasının VI iclasının nəticəsində imzalanmış "Avropa İttifaqı-Ermənistan Tərəfdaşlığı üçün Strateji Gündəlik" adlı sənəddə post-münaqişə dövründə reallıqları təhrif edən və bütövlükdə Azərbaycanla Ermənistan arasında sülh gündəliyinə zidd olan bir sıra məsələlərin prioritetləşdirilməsi ciddi narahatlıq doğurur.
Qiymət Mahir
