Hindistan mediası Bakını hədəfə aldı: Konfrans ətrafında qalmaqal
Hindistan KİV-ləri və ekspertləri "Baku Initiative Group" (BIG) təşəbbüsü ilə Bakıda keçirilən, Hindistandakı siqhlərin və digər azlıqların hüquqlarına həsr olunmuş konfrans ətrafında geniş kampaniya başladıb. Ən sərt iddialar CNN-News18 kanalında səsləndirilib. Burada Azərbaycan faktiki olaraq yeni xalistani hərəkatının platforması kimi təqdim edilməyə çalışılıb və hətta separatçı strukturların fəaliyyəti ilə əlaqələndirilib.
TodayPress TV bu barədə minval.az-a iatinadən məlumat verir.
Bildirilir ki, səsləndirilən ittihamların əksəriyyəti faktlara deyil, fərziyyələrə, siyasi şərhlərə və Hindistan xüsusi xidmət orqanlarındakı adı açıqlanmayan mənbələrə istinadlara əsaslanır. Diqqətçəkən məqamlardan biri də siqh diasporunun nümayəndələrinin beynəlxalq konfransda iştirakı ilə separatizmə dəstək arasında birbaşa əlaqə qurulmasıdır.
Halbuki milli, etnik və ya dini azlıqların vəziyyətinin müzakirəsi insan hüquqları üzrə beynəlxalq forumlarda geniş yayılmış praktikadır. Müəyyən fəalların tədbirdə iştirakı təşkilatçı dövlətin onların siyasi baxışlarını dəstəklədiyini sübut etmir.
Faktiki olaraq, hindistanlı şərhçilər belə bir məntiq irəli sürürlər ki, əgər tədbirdə Hindistandakı azlıqların problemləri müzakirə olunursa, təşkilatçılar avtomatik olaraq “anti-Hindistan kampaniyası”nın iştirakçısına çevrilirlər. Bu yanaşma isə Hindistanın beynəlxalq arenada müdafiə etdiyi fikir və müzakirə azadlığı prinsiplərinə ziddir.
Xüsusilə diqqət çəkən məqam ondan ibarətdir ki, Azərbaycana qarşı əsas arqument kimi onun Türkiyə və Pakistanla münasibətləri göstərilir. Lakin Bakı Türkiyə və Pakistanla strateji tərəfdaşlıq və qardaşlıq münasibətlərini heç vaxt gizlətməyib. Bu ölkələr ən çətin dövrlərdə Azərbaycana dəstək veriblər. Eyni zamanda, Azərbaycanın Hindistanla ikitərəfli münasibətləri uzun müddət Bakı ilə digər dövlətlər arasındakı əməkdaşlıqdan asılı olmayaraq inkişaf edib.
Azərbaycanın Pakistanla hər hansı əməkdaşlığını Hindistan üçün təhdid kimi təqdim etmək daha çox Yeni Dehli ilə İslamabad arasındakı regional rəqabətin təzahürü kimi görünür.
Müəlliflərin ittihamlarını dəstəkləyəcək heç bir açıq sübut təqdim etməməsi də diqqət çəkir. Efir zamanı kəşfiyyat mənbələrinə, kriptovalyutalara, logistika və informasiya şəbəkələrinə dair ehtimallar səsləndirilsə də, konkret faktlar, sənədlər və ya araşdırma nəticələri ortaya qoyulmayıb.
Bu fonda sual yaranır: niyə məhz indi Azərbaycan belə bir informasiya kampaniyasının hədəfinə çevrilib? Cavab geosiyasi müstəvidə axtarıla bilər. Son illərdə Azərbaycan beynəlxalq mövqelərini əhəmiyyətli dərəcədə gücləndirib, Avrasiyanın əsas nəqliyyat və enerji qovşaqlarından birinə çevrilib və Cənubi Qafqazda təsir imkanlarını artırıb. Eyni zamanda Hindistan Ermənistanla, o cümlədən hərbi-texniki sahədə əməkdaşlığını genişləndirir. Belə şəraitdə Bakının Hindistan üçün həssas mövzulara toxunan beynəlxalq fəaliyyəti siyasi rəqabət prizmasından qiymətləndirilir.
Bakıda keçirilən konfrans Hindistan ekspert dairələrinin bir hissəsi üçün siqh diasporunun vəziyyəti ilə bağlı daxili müzakirələri xarici siyasət müstəvisinə çıxarmaq üçün əlverişli fürsətə çevrilib. Lakin beynəlxalq forumun keçirilməsi ilə dövlətin separatizmə dəstək verməsi arasında ciddi fərq mövcuddur və bunu sübut etmək üçün əsaslı dəlillər tələb olunur.
Azərbaycan ardıcıl olaraq beynəlxalq hüquqa, dövlətlərin ərazi bütövlüyünə və digər ölkələrin daxili işlərinə qarışmamaq prinsipinə hörmət etdiyini bəyan edir. Bu səbəbdən Bakının guya “anti-Hindistan fəaliyyətinin” yeni mərkəzi kimi təqdim edilməsi daha çox informasiya kampaniyasını xatırladır.
Nəticə etibarilə məsələ hansısa konfransda kimin iştirak etməsində deyil, beynəlxalq müzakirələrin faktlara, yoxsa siyasi ittihamlara əsaslanmasındadır. Hazırda isə Azərbaycanın ünvanına səsləndirilən ittihamların böyük hissəsi konkret sübutlarla təsdiqlənmir.
