Rusiya BOYKOT etdi: Vaşinqtonda bu addım atılsa…
Rusiyanın xarici işlər naziri Sergey Lavrov bildirib ki, Qrenlandiyada ABŞ-nin hərbi mövcudluğu artarsa, Rusiya buna adekvat cavab verəcək. O, hərbi tədbirləri də istisna etməyib.
Eyni zamanda Rusiya fevralın 19-da Vaşinqtonda keçiriləcək sülh şurasında iştirakdan da imtina edib.
Maraqlıdır, hadisələrin bu cür gedişatı Vaşinqton-Moskva arasında gərginliyi artıracaqmı?
Mövzunu politoloq Züriyə Qarayeva TodayPress TV-yə şərh edib.
Onun sözlərinə görə, Lavrovun Qrenlandiya açıqlaması Moskvanın Arktikanı strateji təhlükəsizlik zonası kimi gördüyünü bir daha ortaya qoyur:
"ABŞ-nin bu ərazidə hərbi mövcudluğunu artırması Rusiya tərəfindən təkcə regional deyil, həm də qlobal güc balansına yönəlmiş addım kimi qəbul olunur. Lavrovun “hərbi tədbirlər də istisna edilmir” mesajı diplomatik xəbərdarlıqdan daha çox çəkindirici siqnal xarakteri daşıyır. Bu bəyanatla Kreml həm Vaşinqtona, həm də NATO-ya göstərmək istəyir ki, Arktikada birtərəfli hərbi genişlənmə cavabsız qalmayacaq və Rusiya bu regionda status-kvonun zorla dəyişdirilməsinə imkan verməyəcək".
Analitik qeyd edib ki, Kremlin sərt mövqeyi Qərb–Rusiya gərginliyini dərinləşdirir. Rusiyanın fevralın 19-da Vaşinqtonda keçiriləcək sülh şurasında iştirakdan imtina etməsi Moskvanın mövcud diplomatik formatlara etimadsızlığını ortaya qoyur. Rusiya bu cür platformaları real dialoqdan çox siyasi təzyiq və legitimləşdirmə aləti kimi qiymətləndirir.
“Bu addım göstərir ki, Kreml hazırkı mərhələdə kompromis axtarışından daha çox güc balansına və sərt mövqeyə üstünlük verir. Nəticədə, həm Qrenlandiya ilə bağlı ritorika, həm də sülh şurasına boykot Qərb–Rusiya xəttində gərginliyin azalmadığını, əksinə yeni coğrafiyalarda dərinləşdiyini göstərən paralel siqnallar kimi qiymətləndirilə bilər”.
Jalə Rövşən
