Qərbi Azərbaycan seçkilərdə kimi seçir? -İNFOQRAFİKA
Ermənistanda seçki mühiti qütbləşmiş vəziyyətdədir. Siyasi səhnənin bir tərəfində Baş nazir Nikol Paşinyanın rəhbərlik etdiyi “Vətəndaş Müqaviləsi” partiyası dayanır. Bu siyasi qüvvə Qərblə, xüsusilə Avropa İttifaqı və ABŞ-la inteqrasiyanı, demokratik institutların gücləndirilməsini və Azərbaycanla sülh müqaviləsinin imzalanmasını əsas prioritet kimi təqdim edir. Digər tərəfdə isə Robert Köçəryanın liderlik etdiyi “Ermənistan” alyansı və ona yaxın mühafizəkar, revanşist qüvvələr yer alır. Onların kampaniyası əsasən təhlükəsizlik məsələləri, Rusiyayla strateji tərəfdaşlığın qorunması və sülh prosesinə ehtiyatlı yanaşma üzərində qurulub.
Azərbaycanın tarixi torpaqları – İrəvan, Sünik, Geğarkunik və digər bölgələr – bu gün Ermənistanın müxtəlif inzibati mərzləri kimi fəaliyyət göstərir. Həmin ərazilərdə seçici davranışı isə eyni deyil və regiondan-regiona ciddi şəkildə fərqlənir.
Paytaxt İrəvan Paşinyanın siyasi dayağı hesab olunur. Şəhərin daha çox urban və gənc elektoratı “sülh və modernləşmə” tezislərinə müsbət yanaşır, Qərbə inteqrasiyanı isə ölkənin inkişafı üçün vacib istiqamət kimi görür.
Buna qarşılıq olaraq, Sünik, Vayots Dzor və Geğarkunik kimi sərhəd bölgələrində təhlükəsizlik məsələləri seçicilərin gündəliyində daha ön sıradadır. Azərbaycanla birbaşa təmas xəttinə yaxın olan bu regionlarda sülh prosesi potensial risk kimi qəbul edilir. Məhz buna görə də müxalifət və revanşist qüvvələr burada paytaxtla müqayisədə daha güclü dəstəyə malikdir.
Qarabağdan köç etmiş seçicilərin məskunlaşdığı ərazilərdə də hakimiyyətə qarşı narazılıq daha açıq hiss olunur. Bu amil müxalifət bloklarının həmin seçici qrupları arasında daha çox səs toplamasına şərait yaradır.
Eyni zamanda, seçicilərin təxminən 20-25 faizinin hələ də qərarsız olması və ya səsverməyə maraq göstərməməsi seçkinin yekun nəticələrini proqnozlaşdırmağı çətinləşdirir. Bu amil kampaniyanın son mərhələsini xüsusilə vacib edir.
Nəzərə alaq ki, seçki prosesi Rusiya ilə Qərb arasında Ermənistan üzərində təsir uğrunda gedən geosiyasi mübarizənin kölgəsində keçirilir. Bu baxımdan, qarşıdurma ölkənin gələcək xarici-siyasi istiqamətini formalaşdıracaq.
Erməni seçicisinin qarşısında duran əsas sual budur: Sülhün gətirdiyi iqtisadi imkanlara üstünlük vermək, yoxsa ənənəvi modelə sadiq qalmaq?
Bu səbəbdən qarşıdan gələn seçkilər bir növ “sülh və modernləşmə” ilə “təhlükəsizlik və revanşizm” arasında seçim olacaq. Maraqlıdır ki, Azərbaycanın tarixi torpaqlarıda məskunlaşan əhali arasında məhz sülh gündəliyinə qarşı müqavimət daha güclü görünür və həmin ərazilər müxalifətin əsas dayaq nöqtələridir.
Qeyd edək ki, Ermənistanda Parlament seçkiləri iyunun 7-də keçiriləcək. Nəticələr Azərbaycan-Ermənistan münasibətlərinin gələcək istiqaməti, sülh müqaviləsinin hüquqi müstəvidə tamamlanması və regionda uzunmüddətli sabitliyin formalaşması baxımından səbirsizliklə gözlənilir.
Jalə Rövşən
