"Cənubi Qafqaz İrandan qopardılıb" – Tehran Qafqazda torpaq iddiası edir
"Cənubi Qafqaz çox da uzaq olmayan keçmişdə bizdən alınıb və hazırda İranın nüfuz dairəsindədir. İran TRİPP layihəsinin həyata keçirilməsinə imkan verməyəcək".
Bunu İranın Azərbaycandakı keçmiş səfiri və hazırda İran prezidentinin administrasiyasında məsul vəzifə daşıyan Seyid Abbas Musəvi deyib.
Görünür, Tehrandakı mühafizəkar dairələr hələ də XIX əsrin geosiyasi masasında ilişib qalıb. Musəvinin iddiaları həm tarixi təhrifdir, həm də regionun bugünkü reallıqlarına tamamilə ziddir.
Musəvinin Gülüstan (1813 - Şimali Azərbaycanın Rusiyaya ilhaqı) və Türkmənçay (1828 - Azərbaycanın iki imperiya arasında yekun bölünməsi) müqavilələrinə eyham vuraraq regional mülkiyyət iddiası irəli sürməsi hüquqi-tarixi baxımdan mifik yanaşmadır.
Bu gün Azərbaycan öz torpaqlarını işğaldan azad etmiş, regionun geosiyasi xəritəsini dəyişmiş suveren bir dövlətdir. Bakını kiminsə "nüfuz dairəsi" adlandırmaq müstəqilliyimizə qarşı birbaşa hörmətsizlikdir və qəbulolunmazdır.
Keçmiş səfir ABŞ-də Donald Trampın regional siyasətinin yaratdığı konyunkturadan istifadə edərək Cənubi Qafqazın İranın təsir zonasına düşdüyünü iddia edir. Lakin unudur ki, Azərbaycan xarici siyasətini böyük güclərin təzyiqlərinə və ya regiondakı kənar kəşfiyyat oyunlarına görə quran ölkə deyil. Bakı tam müstəqil xətt yürüdür. İranın özünü "bölgənin yeganə sahibi" kimi təqdim etmək cəhdi daxili auditoriyaya hesablanmış, heç bir siyasi çəkisi olmayan təbliğatdan başqa bir şey deyil.
Regional nəqliyyat və kommunikasiya layihələrinin reallaşmasına mane olacaqları ilə bağlı hədələr Tehranın oyundan kənarda qalma qorxusunu büruzə verir. Azərbaycan Şərq-Qərb və Şimal-Cənub dəhlizlərinin açar nöqtəsidir. Bakı hər zaman regional əməkdaşlığa açıq olub, lakin heç bir qonşu dövlətin bizim iqtisadi və strateji layihələrimizə veto qoymaq imkanı və hüququ yoxdur.
Musəvinin bəyanatı diplomatik etikadan uzaqdır. Cənubi Qafqazın, xüsusən də regionun taleyini müəyyən edən lider dövləti olan Azərbaycanın heç kimin diktəsinə uymayacağı aydındır. Tehran reallıqla barışmalı və qonşuları ilə təhdid dilində yox, bərabərhüquqlu tərəfdaş kimi danışmağı öyrənməlidir. Əks halda, uduzan özü olacaq.
Jalə Rövşən
