“Bu qələbə xeyirin şər üzərində qələbəsidir” — Ramiz Yunus
“Güclü birlik və on milyonluq xalqın yekdil iradəsi nəticəsində Azərbaycan regionda status-kvonu tam dəyişərək lider dövlətə çevrilib”.
TodayPress TV xəbər verir ki, bunu Xəzər Universitetinin siyasi elmlər üzrə professoru Ramiz Yunus 8 Noyabr — Vətən müharibəsində Zəfər Gününün 5-ci ildönümü münasibətilə “Facebook” hesabındakı paylaşımında yazıb.
Professor qeyd edib ki, bu zəfər Azərbaycanın suverenliyini və ərazi bütövlüyünü tam şəkildə bərpa etməklə, təkcə Ermənistan üzərində deyil, eyni zamanda uzun illər bu ölkənin arxasında dayanan Rusiya və ikili standartlı Qərb siyasəti üzərində də qazanılmış tarixi zəfərdir.
Onun sözlərinə görə, 44 günlük Vətən müharibəsi dövründə Rusiya hər gün İrandan keçməklə Ermənistana silah-sursat göndərirdi, Qərb isə beynəlxalq hüququ tapdalayaraq Azərbaycanın işğal altındakı torpaqlarını görməzlikdən gəlirdi.
Ramiz Yunus yazıb:
“Bu, xeyirin şər üzərində qələbəsidir, ədalətin qələbəsidir. Biz hamımız bu günə inanırdıq və o gün gəldi. Xalq olaraq qalib olmaq hissi hər bir azərbaycanlının qəlbində qürur doğurur. Bu zəfər Azərbaycanın igid övladlarının qanı, qəhrəman şəhidlərimizin və Ali Baş Komandan İlham Əliyevin rəhbərlik etdiyi şanlı ordumuzun böyük fədakarlığı hesabına əldə olunub. O ordunun arxasında isə bütün Azərbaycan xalqı dayanırdı”.
Siyasətçi əlavə edib ki, bu güclü birlik və on milyonluq xalqın yekdil iradəsi nəticəsində Azərbaycan regionda status-kvonu tam dəyişərək lider dövlətə çevrilib:
“Bu gün Azərbaycanın fikri və mövqeyi Vaşinqtonda, Brüsseldə, Parisdə, Moskvada və Tehranda nəzərə alınır — elə o mərkəzlərdə ki, cəmi beş il əvvəl Azərbaycana təzyiq göstərir, təcavüzkar Ermənistanı dəstəkləyirdilər. Biz öz qələbəmizə olan inamımızla həmin mərkəzlərin illərlə formalaşdırdığı yalan və ədalətsizlik paradiqmasını sındırdıq.”
Ramiz Yunusun sözlərinə görə, son beş ildə Azərbaycan xarici siyasətində möhtəşəm uğurlara imza atmaqla sübut edib ki, bir xalq vahid qələbə inamı ilə nələrə nail ola bilər:
“Biz unutmamalıyıq ki, nə yüz il əvvəlki, nə də yeni tariximizdəki səhvləri təkrarlamalıyıq. Nə Ermənistanın, nə də onu dəstəkləyən mərkəzlərin ağlına bir daha torpaqlarımıza göz dikmək fikri gəlsin. Biz hər zaman hər bir ssenariyə hazır olmalıyıq”.
Professor nitqinin sonunda bildirib ki, Azərbaycanın Vətən müharibəsində nümayiş etdirdiyi birlik bu gün də ən böyük strateji üstünlükdür:
“Müasir dünyanın xaotik mənzərəsində güclü və birləşmiş qalmaq həyati dərəcədə vacibdir. Biz bunu bacardıq və bütün dünyaya sübut etdik. Zəfər Günün mübarək, əziz Azərbaycan! Qəhrəmanlarımızın ruhları şad olsun!”
Qiymət Mahir
