Bu ayın pensiyaları niyə artımlarla ödənilmədi?
“Əmək pensiyaları” haqqında Qanuna əsasən, əmək pensiyalarının indeksləşdirilərək artırılması hər il yanvar ayına da şamil olunur”.
TodayPress TV xəbər verir ki, bunu Milli Məclisin deputatı, iqtisadçı Vüqar Bayramov öz “Facebook” hesabında yazıb.
Deputat bildirib ki, artıq yanvar ayı üçün pensiyalar tam ödənilib.
O, "Bu ay artımların verilməməsi nə ilə bağlıdır və artımlar nə zaman ödəniləcək? sualına da aydınlıq gətirib:
“Mövcud qanunvericiliyə əsasən, pensiyalar hər il yanvar ayında əvvəlki ildəki orta aylıq əməkhaqqı artım faizinə uyğun olaraq indeksasiya olunaraq artırılır. Hələlik dəqiq artım faizi bəlli olmasa da, artımlar məhz bu aydan hesablanır. 2025-ci ilin ilk 11 ayının yekunlarına əsasən, ölkə üzrə orta aylıq əməkhaqqı 9,3 faiz artıb. İllik yekunun isə 9,2 faiz olacağı gözlənilir. Dəqiq rəsmi göstərici isə Dövlət Statistika Komitəsi tərəfindən gələn ayın əvvəllərində elan ediləcək”, – parlamentari deyib.
İqtisadçı əlavə edib ki, pensiya artımları fevralda indeksasiya olunaraq yanvar ayı ilə birlikdə ödəniləcək:
“2025-ci ildə orta aylıq əməkhaqqı artımı ilə bağlı rəsmi statistika fevral ayının ilk 10 günündə bəlli olduğu üçün indeksasiya da məhz o zaman aparılacaq. Pensiya artımları yanvarın 1-dən hesablanır, amma artımlar fevral ayında ikisi birlikdə ödəniləcək. Deməli, pensiyaçılar artımları gələn aydan etibarən alacaqlar. Amma yanvar ayı üçün hesablanmış artım da fevral ayının pensiya məbləğinə əlavə olunacaq”.
Deputat vurğulayıb ki, indeksləşdirmə bütün əmək pensiyalarına tətbiq edilir:
“İndeksləşdirmə bütün növ əmək pensiyalarına şamil olunur. ‘Əmək pensiyaları haqqında’ Qanunun 4-cü maddəsinə əsasən, əmək pensiyalarının üç növü təsbit olunub. Bunlar yaşa görə əmək pensiyası, əlilliyə görə əmək pensiyası və ailə başçısını itirməyə görə əmək pensiyasıdır. Deməli, vətəndaşımız növündən asılı olmayaraq əmək pensiyası alırsa, onun pensiya məbləğinə artım hesablanacaq”.
Jalə Rövşən
