Soyuq hava oynaq ağrılarını niyə artırır?

Havanın dəyişməsi zamanı oynaqlarda yaranan ağrılar alimləri uzun illərdir maraqlandıran mövzudur. Tədqiqatçılar hələ bu hadisənin səbəblərini tam müəyyən edə bilməsələr də, indiyədək aparılan araşdırmalar hava təzyiqi, rütubət və külək sürətindəki dəyişikliklərin bəzi insanlarda ağrı hissini artırdığını göstərir.

TodayPress TV xəbər verir ki, “Discover” və “Focus” jurnallarında dərc olunan elmi məlumatlara əsasən, soyuq və ya rütubətli havalarda oynaq ağrılarının əsas səbəblərindən biri atmosfer təzyiqinin azalmasıdır.

Bu, Yer səthindəki barometrik təzyiqin enməsi ilə əlaqədardır.

Alimlərin izahına görə, havanın soyuması zamanı təzyiq azalır, soyuq hava kütləsi aşağı enir və isti havanı yuxarı sıxışdırır. İsti hava soyuyaraq sıxılır və bulud əmələ gətirir — nəticədə hava kəskin şəkildə soyuyur. Məhz bu zaman bədən üzərinə düşən təzyiq azalır. Təzyiqin azalması oynaqlardakı sıxılmanın zəifləməsinə, əzələ, vətər və digər toxumaların genişlənməsinə səbəb olur. Bu proses oynaqdaxili sürtünməni azaldan sinovial mayenin tərkibini dəyişərək ağrı hissini gücləndirə bilər.

Mütəxəssislərin fikrincə, revmatoid artrit, osteoartrit və fibromialgiyadan əziyyət çəkən insanlar atmosfer təzyiqinin azalmasına daha həssas olurlar. Eyni zamanda tədqiqatlar göstərir ki, hava təzyiqindəki dəyişikliklər bəzilərində stress səviyyəsini də artırır, bu isə “fantom ağrılar” adlanan, fiziki səbəbi olmayan ağrıları daha da gücləndirə bilər.

Soyuq hava, həmçinin əvvəllər zədə almış insanlarda – sümükləri sınan, vətərləri dartılan və ya əzələləri zədələnən şəxslərdə sərtlik və narahatlıq yaradır. Bu hal toxumaların şişməsi, damarların daralması və ya əzələlərin sinirlərə təzyiq göstərməsi ilə əlaqələndirilir.

Alimlər bildirirlər ki, təkcə soyuq deyil, yüksək rütubət də bir sıra xəstəlikləri, o cümlədən oynaq ağrısı və miqreni ağırlaşdırır.

Qiymət Mahir