Körpəsinə verdiyi ada görə HƏBS EDİLDİ
Övladına qoyduğu ada görə tətbiq edilən cəriməni ödəməyən Norveç vətəndaşı Kirsti Larsen barəsində iki günlük həbs qərarı çıxarılıb.
TodayPress TV xəbər verir ki, bu barədə "The Mirror" qəzeti yazıb.
Məlumata əsasən, Norveç rəsmiləri yeni doğulan uşağa verilən Geşer adını xarici mənşəli olması səbəbindən qəbul etməyiblər.
Bundan əlavə, həmin adın oğlan uşağı üçün uyğun olmadığı və Gezer soyadına çox bənzədiyi üçün çaşqınlıq yarada biləcəyi qeyd edilib.
Yerli hakimiyyət orqanları ilə yaranan anlaşılmazlıq nəticəsində körpənin vaxtında qeydiyyata alınmaması səbəbindən Larsenə 1 600 kron məbləğində cərimə tətbiq edilib. Lakin o, cəriməni ödəməyin "öz təqsirini etiraf etmək" anlamına gələcəyini düşünərək məbləği ödəməkdən imtina edib. Heç bir gəlir mənbəyi və müsadirə edilə biləcək əmlakı olmadığı üçün ödənilməmiş cərimə iki günlük həbslə əvəz olunub və qadın cəzasını çəkib.
Bildirilir ki, Geşer adının seçilməsi Kirsti Larsenin gördüyü yuxu ilə əlaqədardır. Belə ki, o, yuxuda bir səsin ona oğluna "körpü" adını verməsini söylədiyini eşidib. Nəticədə qadın övladına bu sözün ivrit dilindəki qarşılığını ad kimi verməyə qərar verib.
