İnsanlar sağlamlıq məlumatlarını haradan alırlar?
İnsanlar sağlamlıqla bağlı məlumat almaq üçün ən çox həkimlərə və digər səhiyyə işçilərinə müraciət edirlər.
TodayPress TV xəbər verir ki, bununla bağlı "Pew" Araşdırma Mərkəzi sorğu aparıb.
Respondentlərin 85%-i ən azı bəzən bu mənbədən istifadə etdiyini bildirib.
Sorğuya görə, amerikalıların 60%-i "WebMD" və "Mayo Clinic" kimi böyük səhiyyə saytlarına da baxır. Bundan əlavə, insanların 66%-i oxşar sağlamlıq problemləri yaşayan digər şəxslərin təcrübələrindən öyrənir.
Amerikalıların 36%-i sosial mediadan, 22%-i isə süni intellekt çatbotlarından sağlamlıq məlumatı aldığını deyir. Lakin bu mənbələr daha az etibarlı hesab olunur.
Sorğuda iştirak edənlərin yarısı sağlamlıq məlumatlarının doğru olub-olmadığını müəyyən etməyin çətin olduğunu bildirib. Həmçinin 54% ziddiyyətli məlumatlarla qarşılaşdıqda hansına inanacağını seçməkdə çətinlik çəkir.
Ümumilikdə, amerikalılar ən etibarlı məlumatı səhiyyə işçilərindən və böyük tibbi saytlarından aldıqlarını düşünürlər. Sosial media isə ən aşağı etibar səviyyəsinə malikdir.
Araşdırma göstərir ki, məlumat mənbələrinin artmasına baxmayaraq, amerikalılar hələ də sağlamlıq mövzusunda ən çox ənənəvi və peşəkar mənbələrə güvənirlər.
Türkan İsgəndərli
