İKZF-nin zəmanəti ilə sahibkarlara 600 milyon manata yaxın kredit verildi
2025-ci il iyulun 1-nə olan məlumata görə, müvəkkil banklar tərəfindən Azərbaycan Respublikası İpoteka və Kredit Zəmanət Fondunun zəmanəti ilə sahibkarlara güzəştli şərtlərlə 587,9 mln manat məbləğində kreditə zəmanət verilib ki, bunun da 38,2 mln manatı cari ilin yanvar-iyun aylarının payına düşür.
Bu barədə TodayPress TV-yə Azərbaycan Respublikası İpoteka və Kredit Zəmanət Fondundan (İKZF) məlumat verilib.
Məlumata görə, mexanizm çərçivəsində indiyə qədər zəmanət verilmiş kreditlərin orta müddəti 28 ay, Fond tərəfindən sahibkarlıq kreditləri üzrə hesablanmış faizlərin bir hissəsinə subsidiyanın verilməsi hesabına sahibkarların ödəyəcəyi kreditlər üzrə faktiki faiz dərəcəsi 6,2 %, bir sahibkara ayrılan kreditin məbləği isə 30 min manatdan 5 milyon manatadək təşkil edib.
Kreditlər sənaye məhsullarının istehsalı və emalı, kənd təsərrüfatı və qida sənayesi, tikinti sektoru, turizm və infrastrukturun inkişaf etdirilməsi ilə bağlı sahələrə, maşın və avadanlıq istehsalına, ticarət və xidmət sektoruna yönəldilib.
Fondun zəmanət və faiz subsidiyası hesabına sahibkarlara ayılan kreditlər vasitəsilə maliyyələşən layihələr üzrə 5700 yeni iş yerinin yaradılması nəzərdə tutulub.
