Microsoft Windows 11-in 26H1 sınaq versiyasını təqdim etdi
Microsoft Windows 11-in 26H1 versiyasını sınağa təqdim edib
TodayPress TV "Gazeta.ru" ya istinadən xəbər verir ki, Microsoft, Windows 11 əməliyyat sisteminin yeni 26H1 versiyasının hazırlanıb sınağa göndərildiyini açıqlayıb. Şirkətin məlumatına görə, 28000 nömrəli qurma artıq Windows Insider proqramının Canary kanalında istifadəçilər üçün əlçatandır.
26H1 versiyası əsas funksional yeniliklərdən çox, sistem infrastrukturunun yenilənməsi və yeni aparat çipləri ilə uyğunluğun təmin edilməsinə yönəlib. Rəsmi olaraq adı açıqlanmayan yeni çipin Copilot+ kompüterləri üçün nəzərdə tutulan Snapdragon X2 prosessorları ilə bağlı olduğu ehtimal edilir.
Microsoft bildirib ki, yeni funksiyalar əsasən Windows 11-in 25H2 versiyasında təqdim olunmağa davam edəcək, 26H1 isə daha çox aparat uyğunluğu və platforma səviyyəsində dəyişiklikləri özündə birləşdirir.
26H1 qurması həmçinin bir neçə kiçik düzəliş təqdim edir. Onlara Canlı Altyazı funksiyasının dayanması probleminin aradan qaldırılması və hesab daxilolma zamanı Outlook pəncərəsinin görünməməsi ilə bağlı səhvin düzəldilməsi daxildir.
Microsoft hazırda Windows 11-in 25H2 versiyasının geniş yayılmasını davam etdirir. Bu yeniləmə əvvəlki 24H2 funksiyalarını aktivləşdirir və dəstək müddətini uzadır: Home və Pro versiyaları üçün 24 ay, Enterprise və Education versiyaları üçün isə 36 ay.
