"Apple" M5 çipli "MacBook Pro" modellərini fevralda təqdim edə bilər
"Apple" "M5 Pro" və "M5 Max" çipləri ilə təchiz olunan yeni "MacBook Pro" modellərini "macOS 26.3" ilə eyni vaxtda, əsasən fevralda təqdim etməyi planlaşdırır.
TodayPress TV xəbər verir ki, bu barədə "Bloomberg"in texnologiya üzrə icmalçısı Mark Gurman məlumat yayıb.
Onun sözlərinə görə, flaqman noutbukların təqdimatı fevralın sonu–martın əvvəlinə planlaşdırılıb və buraxılış "macOS 26.3"ün relizi ilə sinxronlaşdırılacaq.
Jurnalist gələcək cihazların daxili kod adlarını da açıqlayıb — J714 və J716. Gözləntilərə əsasən, yeni nəsil "Apple" "Silicon" platformasının növbəti mərhələsini təmsil edəcək "M5 Pro" və "M5 Max" prosessorları peşəkar sistemlər üçün performans artımı gətirəcək.
Gurman mart ayındakı təqdimatı daha az ehtimal olunan ssenari kimi qiymətləndirir. Onun sözlərinə görə, "macOS 26.3"ün təşkilati və ya texniki səbəblərlə gecikməsi halında elan mart ayına keçə bilər. Əsas və ən real pəncərə isə fevraldır.
Eyni vaxtda "iOS 26.3"ün buraxılışı, az sonra isə tərtibatçılar üçün "iOS 26.4"ün beta versiyasının çıxışı gözlənilir. Həmin beta versiyada "Siri"nin "Google Gemini" süni intellekti əsasında yenilənmiş versiyasının inteqrasiyası nəzərdə tutulur.
Qiymət Mahir
