UFC-DƏ DİN MÖVZULU QALMAQAL: STRİKLEND ÇİMAYEVİ HƏDƏF ALDI

UFC dünyasında “traş-tok” və sərt söz duelləri adi hal sayılsa da, Şon Striklend bu dəfə təkcə rəqibini deyil, dini və mədəni mövzuları da hədəfə alaraq ciddi mübahisə yaradıb. Amerikalı döyüşçünün Hamzat Çimayev və müsəlman icması barədə səsləndirdiyi fikirlər sosial şəbəkələrdə geniş rezonans doğurub.

STRİKLENDDƏN MÜSƏLMANLARA QALMAQALLI HÜCUM: “AMERİKAYA AİD DEYİLLƏR”

Striklend çıxışında Çimayevi “dinin arxasında gizlənməkdə” ittiham edib, onu qorxaqlıqda günahlandırıb və UFC-ni müsəlman döyüşçülərə görə tənqid edib. O, həmçinin Fransada müəllim Samuel Patinin qətlə yetirilməsi hadisəsinə toxunaraq bəzi müsəlman idmançıların bu məsələyə münasibət bildirmədiyini deyib. Bununla yanaşı, Striklend “Amerika ilə uyğun olmayan insanlar” ifadəsini işlədərək daha sərt reaksiyalara səbəb olub.

Bu açıqlamalar artıq adi idman rəqabətindən çıxaraq dini və ideoloji qarşıdurma səviyyəsinə keçib. Çünki burada yalnız iki döyüşçü arasındakı şəxsi münasibət deyil, həm də Qərbdə söz azadlığı ilə dini həssaslıq arasındakı köhnə mübahisə yenidən gündəmə gətirilir.

Hamzat Çimayev indiyə qədər din və ailə mövzularında sərt mövqeyi ilə seçilib. O, Striklendin səsləndirdiyi fikirlərə, İslamın terror və zorakılıqla eyniləşdirilməsinin yanlış olduğu, bir neçə radikal hadisəyə görə bütün müsəlmanların ittiham edilməsinin qəbuledilməz sayıldığı, dini təhqirin “ifadə azadlığı” adı altında normallaşdırılmasına qarşı çıxdığını, Oktaqon daxilində cavab verməyin daha doğru yol olduğu mesajını verib.  

Çimayevin tərəfdarları hesab edir ki, Striklend diqqət çəkmək üçün dini mövzudan istifadə edir. Amerikalı döyüşçünün fanatları isə onun “siyasi korrektlikdən uzaq” danışdığını müdafiə edirlər.

Nəticədə bu qalmaqal UFC-də sadəcə növbəti “traş-tok” deyil, həm də din, mədəniyyət və Qərb-Şərq dəyərləri üzərində gedən daha geniş debatın bir hissəsinə çevrilib.

ŞON STRİKLENDİN AÇIQLAMALARI SOSİAL ŞƏBƏKƏLƏRİ QARIŞDIRDI

Məlum sərt söz duelinin problemi ondadır ki, Striklend fərdi radikal hadisələri bütöv bir dini icma ilə əlaqələndirir. Bu isə milyonlarla insanı eyni düşüncə altında təqdim etmək kimi təhlükəli ümumiləşdirməyə gətirib çıxarır. Xüsusilə MMA kimi qlobal auditoriyası olan idmanda bu tip çıxışlar həm islamofobiya ittihamlarını gücləndirir, həm də fanatlar arasında parçalanma yaradır.

Digər tərəfdən, müsəlman döyüşçülər üçün din şəxsi kimliyin əsas hissəsidir və onlar dini təhqiri sadəcə zarafat kimi qəbul etmirlər. Buna görə də Çimayev və onun kimi idmançıların dini məsələlərdə sərt reaksiya verməsi onların dünyagörüşündən qaynaqlanır. Ancaq burada əsas məqam radikal zorakılığı dəstəkləmək ilə dini dəyərləri qorumaq arasında sərhədin düzgün çəkilməsidir.

UFC 328 çərçivəsində keçiriləcək Hamzat Çimayev – Şon Striklend döyüşü bu gün - 9 may 2026-cı ildə ABŞ-nin “Prudential Center” arenasında baş tutacaq. Əsas kartın başlanğıcı ABŞ vaxtı ilə saat 21:00-a, Azərbaycan vaxtı ilə isə gecə 05:00-a təsadüf edir.  

Unutmayın, UFC əsas döyüşlərinin vaxtı əvvəlki qarşılaşmaların müddətindən asılı olaraq dəyişə bilər.

Kifayət qədər gərgin və səs-küylü keçəcək döyüş gecəsinin qəhrəmanlarının karyeralarına diqqət yetirək. 

BİRİ SƏSSİZ QATİL, DİGƏRİ QALMAQAL KRALI: UFC-Nİ SİLKƏLƏYƏN DUEL

Hamzat Çimayev 1 may 1994-cü ildə Çeçenistanda anadan olub. Daha sonra ailəsi ilə birlikdə İsveçə köçüb və idman karyerasını əsasən burada qurub. O, sərbəst güləş bazasından gələn döyüşçüdür və qısa müddətdə UFC-nin ən qorxulu rəqiblərindən birinə çevrilib.

Çimayev peşəkar MMA karyerasına 2018-ci ildə başlayıb. UFC-də debüt etdikdən sonra isə rekord sürətlə populyarlıq qazanıb. Xüsusilə ardıcıl dominant qələbələri və rəqiblərindən az zərbə buraxması onu təşkilatın əsas ulduzlarından birinə çevirib.

Çimayev, Gilbert Berns üzərində dramatik qələbəsi, Kamaru Usman ilə dramatic qarşılaşma, Robert Uittaker və digər top rəqiblərlə baxımlı döyüşləri ilə adını UFC azarkeşlərinə sevdirib. 

Çimayevin əsas üstünlüyü güləş, fiziki güc və aqressiv pressinqdir. O, rəqiblərini erkən raundlarda yoraraq dominantlıq qurmağa çalışır.

UFC ailəsində Çimayev “yeni nəslin təhlükəli superulduzu” kimi qəbul olunur. Dana Uayt onu uzun illər təşkilatın əsas simalarından biri hesab edib. Müsəlman və Qafqaz mənşəli azarkeşlər arasında isə xüsusi populyarlığa malikdir.

Şon Striklend 27 fevral 1991-ci ildə ABŞ-nin Kaliforniya ştatında anadan olub. O, UFC-nin ən qalmaqallı və ən açıq danışan döyüşçülərindən biri sayılır.

Striklend MMA karyerasına gənc yaşlarında başlayıb və uzun illər ərzində müxtəlif çəki dərəcələrində çıxış edib. O, xüsusilə sərt bokslu stili, yüksək dözümlülüyü və psixoloji təzyiqi ilə seçilir.

Ən böyük uğuru UFC orta çəki kəmərini qazanması olub. O, həmin döyüşdə favorit hesab edilən Israel Adesanya üzərində sensasion qələbə qazanaraq dünya çempionu olub.

Striklendin məşhur döyüşləri sırasında Israel Adesanya ilə titul döyüşü, Drikus dyu Plessi ilə gərgin qarşılaşma, Paulo Kosta və digər rəqiblərlə döyüşlər var. 

Striklend UFC-də daha çox “anti-qəhrəman” obrazı ilə tanınır. O, sosial və siyasi mövzularda sərt fikirlər səsləndirməsi ilə tez-tez gündəmə gəlir. Traş-tok bacarığı və emosional çıxışları onu həm çox sevilən, həm də çox tənqid olunan simaya çevirib.

ÇİMAYEV VƏ STRİKLEND: NİFRƏT, DİN VƏ QƏFƏSDƏ SAVAŞ

Hamzat Çimayev və Şon Striklend qarşıdurması təkcə idman baxımından deyil, xarakter və dünya görüşü baxımından da maraq doğurur.

Çimayev daha çox intizamlı, dini dəyərlərə bağlı və aqressiv döyüş maşını obrazı, Striklend isə sərbəst danışan, provokativ və psixoloji savaş sevən döyüşçü kimi tanınır. 

Bu səbəbdən onların mümkün döyüşü UFC-də son illərin ən prinsipial və emosional qarşıdurmalarından biri hesab olunur.

Namiq HUN