NBA-da qalmaqal: Yeni müqavilədən sonra məhkəməyə müraciət etdi

“Hyuston Rokets”in basketbolçusu Tari İson keçmiş sevgilisi Merilin Maritsa Melo Rodrigesə qarşı məişət zorakılığı iddiaları ilə məhkəməyə müraciət edib.

TodayPress TV xəbər verir ki, bu barədə TMZ məlumat yayıb.

Basketbolçunun iddiasına görə, keçmiş sevgilisi onun üzünə yumruq vurub, 92 min ABŞ dolları dəyərində dizayner geyimlərini ağardıcı maddə ilə yararsız hala salıb. 

İson həmçinin bildirib ki, qadın tanışı vasitəsilə ona “hər iki ayağını sındıracağı” və “onu öldürəcəyi” barədə hədələr göndərib.

Tari İson məhkəmədən mühafizə orderinin verilməsini, həmçinin “Hyuston Rokets”in Kaliforniyada keçirdiyi oyunlar zamanı təhlükəsizliyinin təmin olunmasını xahiş edib.

Qeyd edək ki, basketbolçu “Hyuston Rokets”lə tam zəmanətli 5 illik, 81,5 milyon dollarlıq yeni müqavilə imzalayıb. Bununla da onun NBA karyerası ərzində zəmanətli gəliri 97 milyon ABŞ dollarını ötüb.

İson ötən mövsüm karyerasının ən məhsuldar çıxışını edib. O, 60 oyunda orta hesabla 25 dəqiqə meydanda olub.

Namiq HUN