Bir il kənarda qaldı, “Formula-1”ə sevgisi daha da artdı!

“Cadillac” komandasının pilotu Valtteri Bottas ehtiyat pilot kimi keçirdiyi mövsümün “Formula-1”ə münasibətini dəyişdiyini bildirib.

TodayPress TV xəbər verir ki, bu barədə “Formula-1”in mətbuat xidməti məlumat yayıb. 

Finlandiyalı sürücünün sözlərinə görə, 12 il əsas heyətdə yarışdıqdan sonra bir mövsüm start düzülüşündən kənarda qalmaq ona idmana fərqli prizmadan baxmaq imkanı verib.

“12 il yarışdıqdan sonra bir mövsüm start düzülüşündə yer almamaq insana “Formula-1”i başqa cür dərk etməyə kömək edir. Artıq yalnız öz çıxışına deyil, bütöv mənzərəyə baxırsan.

Bu təcrübə idmana, burada çalışan insanlara və pilotlara hörmətimi daha da artırdı. Düşünürəm ki, indi “Formula-1”in dəyərini əvvəlkindən daha yaxşı anlayıram.

Məsələn, Melburnda startdan əvvəl dövlət himninin səsləndirilməsi mənə tamam fərqli hisslər yaşatdı. Əvvəllər bu anların qiymətini bu qədər bilmirdim. Bir şeyi itirib yenidən qazandıqda onun nə qədər xüsusi olduğunu anlayırsan. Hazırda start düzülüşündə yer alan 22 pilotdan biri olduğum üçün özümü daha çox xoşbəxt hiss edirəm”, – deyə Bottas bildirib.

Namiq HUN