Arteta reallığı xatırlatdı: “Ən yaxşı olmaq üçün titullar lazımdır”
“Arsenal” klubunun baş məşqçisi Mikel Arteta “Mançester Siti”nin çalışdırıcısı Xosep Qvardiolanın “topçular”ı hazırda dünyanın ən yaxşı komandası adlandırmasına münasibət bildirib.
TodayPress TV xəbər verir ki, bu barədə klubun rəsmi saytı məlumat yayıb.
Arteta qeyd edib ki, komandası mükəmməlliyə can atır və bir çox şeyi düzgün edir, lakin hələ ideal səviyyədən uzaqdır.
“Düşünürəm ki, biz daim mükəmməlliyə can atan bir komandayıq. Çox şeyi düzgün edirik, amma ideal səviyyədən uzağıq. Yeganə məqsədimiz hazırda olduğumuz səviyyəni qorumaq və xüsusilə bəzi sahələrdə nəticələrimizi daha da yaxşılaşdırmaqdır.
Öz komandan və gördüyün iş barədə müsbət sözlər eşitmək hər zaman xoşdur. Amma bu, çox iddialı ifadələrdir. Mənim fikrimcə, buna uyğun olmaq üçün çoxlu titul qazanmaq lazımdır. Biz isə bunu hələ etməmişik. Buna baxmayaraq, hər gün özümüzün ən yaxşı versiyası olmağı hədəfləyirik və buna çatana qədər dayanmayacağıq”, - deyə Arteta bildirib.
Namiq HUN
