85 milyonluq dilemma: “İnter” Niko Pas üçün hərəkətə keçdi
Milanın “İnter” klubu yarımmüdafiəçi Niko Pası izləmək üçün Komo şəhərinə öz nümayəndələrini göndərib.
TodayPress TV xəbər verir ki, bu barədə Topskills Sports UK sosial şəbəkə X-də məlumat yayıb.
Bu fakt klubun “Real” akademiyasının yetirməsi olan futbolçunu yay transfer pəncərəsində heyətinə qatmaq niyyətində olduğunu göstərir.
“İnter” üçün transferin baş tutması ciddi maliyyə vəsaiti tələb edəcək. Belə ki, “Komo” Niko Pası 85 milyon avro dəyərində qiymətləndirir. Madrid “Real”ı isə imtiyazlı mövqeyə malikdir - klubun 2026-cı il üçün təxminən 9 milyon avro məbləğində geri-alma bəndi var.
Bu səbəbdən “İnter” də daxil olmaqla digər maraqlı klubların “Komo”nu futbolçudan imtina etməyə razı salmaq üçün çox cəlbedici təklif irəli sürməsi zəruridir.
Qeyd edək ki, Niko Pas cari mövsümdə bütün turnirlərdə 24 oyunda iştirak edib. Onun aktivində 9 qol və 6 məhsuldar ötürmə var. Transfermarkt portalında futbolçunun bazar dəyəri 65 milyon avro olaraq qiymətləndirilir.
Namiq HUN
