Azərbaycanda kağızsız hökumətə keçid tarixi açıqlandı
Azərbaycanda rəqəmsal dövlət idarəçiliyinə keçid istiqamətində növbəti addım atılıb. Daha beş İcra Hakimiyyətinin informasiya texnologiyaları sistemləri "Hökumət buludu"na köçürülüb. Bu proses "Rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı" çərçivəsində həyata keçirilən tədbirlərin tərkib hissəsidir.
TodayPress TV xəbər verir ki, mövzu ilə bağlı danışan deputat Vüqar Bayramov bildirib ki, kağızsız hökumət modelinin formalaşdırılması istiqamətində əsas icraçı qurum Rəqəmsal İnkişaf və Nəqliyyat Nazirliyidir.
"Fəaliyyət Planına əsasən, kağızsız hökumətin formalaşdırılması çərçivəsində dövlət qurumlarının daxili biznes proseslərinin, o cümlədən maliyyə, insan resursları və satınalma sahələrinin ən azı 80 faizinin təhlili aparılacaq. Eyni zamanda, müəssisə resurslarının planlaşdırılması və rəqəmsal iş axını üçün vahid texniki meyarlar hazırlanaraq təsdiqlənəcək".
Onun sözlərinə görə, həyata keçiriləcək tədbirlər nəticəsində müəssisə resurslarının planlaşdırılması (ERP) və rəqəmsal iş axını sistemlərini tətbiq edən dövlət qurumlarının payı 40 faizi ötəcək.
"Azərbaycanda kağızsız hökumət modelinə keçidin 2028-ci ilin iyul ayında reallaşdırılması nəzərdə tutulur. Bu mərhələdə dövlət qurumlarında sənəd dövriyyəsinin və inzibati əməliyyatların 80 faizinin rəqəmsal formata keçirilməsi hədəflənir".
Deputatın fikrincə, bu transformasiya təkcə dövlət idarəçiliyinin səmərəliliyini artırmayacaq, həm də iqtisadi inkişaf üçün yeni imkanlar yaradacaq.
"Kağızsız hökumət modelinin tətbiqi innovativ sahələrin ümumi daxili məhsuldakı payının artmasına, sahibkarlıq mühitinin daha da yaxşılaşmasına, vətəndaşların dövlət xidmətlərindən istifadəsinin genişlənməsinə və dövlət idarəçiliyinin rəqəmsal transformasiyasının sürətlənməsinə mühüm töhfə verəcək", – deyə Vüqar Bayramov əlavə edib.
Qeyd edək ki, sənədə əsasən, qarşıdakı iki il ərzində ölkədə rəqəmsal infrastrukturun inkişafı, elektron hökumət xidmətlərinin genişləndirilməsi və dövlət idarəçiliyində elektronlaşmanın daha da sürətləndirilməsi əsas prioritet istiqamətlər kimi müəyyən edilib.
Fəaliyyət Planının mühüm hədəflərindən biri isə kağızsız hökumət modelinə keçidin təmin edilməsidir. Bu çərçivədə dövlət qurumlarında sənəd dövriyyəsinin tam elektronlaşdırılması, daxili idarəetmə proseslərinin rəqəmsallaşdırılması və vahid rəqəmsal iş axınının formalaşdırılması nəzərdə tutulur.
Türkan İsgəndərli
