Otomikoz nədir? Qulaq göbələyinin yaranma səbəbləri və müalicəsi
Qulaqda yaranan göbələk infeksiyası, tibbi dildə otomikoz həm uşaqlarda, həm də böyüklərdə rast gəlinən yayğın problemlərdən biridir.
TodayPress TV xəbər verir ki, mütəxəssislərin sözlərinə görə, xəstəlik xarici qulaq yolunda göbələk mikroorqanizmlərinin çoxalması nəticəsində inkişaf edir və vaxtında müalicə olunmadıqda ciddi narahatlıqlara səbəb ola bilər.
Otomikozun əsas əlamətləri arasında qulaqda qaşınma, ağrı, tutulma hissi, eşitmənin zəifləməsi və qulaqdan axıntı gəlməsi yer alır. Bəzi hallarda xəstələr qulaqda küy və ya narahatlıq hissindən də şikayət edirlər.
Həkimlər bildirirlər ki, qulaq göbələyinin yaranmasına bir sıra amillər təsir göstərə bilər. Bunlara qulağın tez-tez təmizlənməsi nəticəsində qoruyucu təbəqənin zədələnməsi, üzgüçülük və ya uzun müddət nəm mühitdə qalmaq, immun sisteminin zəifləməsi, diabet xəstəliyi və antibiotiklərdən uzunmüddətli istifadə daxildir.
Mütəxəssislər qulaqda qaşınma və ya axıntı kimi əlamətlər yarandıqda özbaşına müalicədən çəkinməyi tövsiyə edirlər. Diaqnoz qulaq-burun-boğaz həkimi tərəfindən müayinə əsasında qoyulur və müalicə xəstəliyin ağırlıq dərəcəsinə uyğun müəyyən edilir.
Otomikozun müalicəsində ilk növbədə qulaq yolu təmizlənir, daha sonra isə göbələk əleyhinə dərman preparatları təyin olunur. Müalicə müddətində qulağın quru saxlanılması və həkim göstərişlərinə əməl edilməsi vacib hesab olunur.
Mütəxəssislər vurğulayırlar ki, erkən diaqnoz və düzgün müalicə sayəsində qulaq göbələyindən qısa müddətdə xilas olmaq mümkündür.
Türkan İsgəndərli
