Zaxarova Xəzəryanı ölkələrlə bağlı iclas keçirməyi təklif etdi

Rusiya Xarici İşlər Nazirliyinin (XİN) rəsmi nümayəndəsi Mariya Zaxarova Xəzəryanı ölkələrin – Azərbaycan, İran, Qazaxıstan, Rusiya və Türkmənistan – xarici siyasət qurumlarının informasiya sahəsinə cavabdeh rəhbərlərinin görüşünün təşkilini təklif edib.

TodayPress TV "TASS"a istinadən xəbər verir ki, o, bu barədə Xəzər Media Forumunun iştirakçılarına videomüraciətində məlumat verib.

“Düşünürəm ki, Xəzər formatında informasiya işi ilə məşğul olan xarici siyasət idarələrinin rəhbərlərinin görüşü barədə düşünmək olar. Qarşıda duran ümumi vəzifələri nəzərə alaraq, əminəm ki, bir çox həmkarlarımız bizi dəstəkləyəcək”.

Diplomat qeyd edib ki, Xəzər regionunda media əməkdaşlığı sahəsində hələ tam istifadə olunmamış geniş potensial mövcuddur. Onun sözlərinə görə, bu ölkələr arasında artıq çoxsaylı ikitərəfli razılaşmalar mövcuddur və vaxtaşırı məsləhətləşmələr keçirilir.

“Yaxın günlərdə İranlı həmkarlarla da bu mövzuda bir görüşümüz oldu”, - deyə o əlavə edib.

Zaxarova həmçinin vurğulayıb ki, belə bir görüş keçmişdəki müsbət əməkdaşlıq təcrübəsinə əsaslanaraq gələcəyə doğru birgə addımların müzakirəsinə həsr oluna bilər.

Töhfə Səməd