Ukrayna Rusiyanın logistika ürəyini vurdu - VİDEO

Rusiyanın Ryazan vilayətində yerləşən Wildberries logistika anbarının pilotsuz uçuş aparatlarının hücumu nəticəsində fəaliyyətini dayandırdığı bildirilir.

TodayPress TV xəbər verir ki, bu barədə The Kyiv Independent nəşri yerli mənbələrə istinadən məlumat yayıb.

Məlumata görə, hücum zamanı Ryazan şəhərində yerləşən "Rosneft"ə məxsus Ryazan Neft Emalı Zavodunda da güclü yanğın başlayıb. Sosial şəbəkələrdə yayılan görüntülərdə həm logistika mərkəzi, həm də neft emalı zavodu ərazisindən qalxan qalın tüstü müşahidə olunur.

Ryazan vilayətinin qubernatoru Pavel Malkov bölgəyə pilotsuz uçuş aparatları ilə kütləvi hücum edildiyini təsdiqləsə də, zərər görən obyektlərin adlarını açıqlamayıb. Hadisənin nəticələri, dağıntının miqyası və mümkün itkilərlə bağlı hələlik rəsmi məlumat verilməyib.

Qeyd edək ki, son günlər Ukraynanın Rusiyanın hərbi-sənaye və logistika infrastrukturuna qarşı uzaqmənzilli PUA hücumlarını intensivləşdirdiyi bildirilir.

Jalə Rövşən