Tramp: Ukrayna 25 faiz ərazi itirdi, Zelenski isə Baydendən milyardlar aldı
ABŞ Prezidenti Donald Tramp Ukrayna Prezidenti Volodimir Zelenskini amerikalı sahibkar Barnuma bənzədib.
TodayPress TV xəbər verir ki, o, “Politico” nəşrinə müsahibəsində Volodimir Zelenksidən danışıb, onu məşhur amerikalı sahibkar Barnuma bənzədib.
“Putindən əvvəl də belə bir fikir mövcud idi ki, Ukrayna NATO-ya qoşulmayacaq. Bu həqiqətən də Putindən əvvəl idi. Amma indi Ukraynanın NATO-ya qoşulması üçün çalışırlar. Bilirsiniz, Zelenski Putinlə ilk dəfə görüşəndə ona sadəcə iki şey istədiyini dedi: Krımın qaytarılması və NATO-ya üzvlük. O, bunu nəzakətli qaydada demədi. Bilirsiniz, o, çox əla satıcıdır. Mən onu Barnum adlandırıram”, - Tramp bildirib.
ABŞ lideri Zelenski ilə bağlı fikirlərinə daha da aydınlıq gətirib: “Barnum dünyanın ən yaxşısı idi. O, istənilən məhsulu istənilən vaxt sata bilirdi. Zelenski də bu cürdür. O, fırıldaqçı Co Baydendən 350 milyard dollar ala bildi. Baxın, bu ona necə baha başa gəldi. Ölkəsinin 25 faizi öz əlində deyil”.
Jalə Rövşən
