Putin rusiyalı oliqarxı hakimiyyətə gətirir - Gizli sənədlər yayıldı
İrəvan mediası Rusiya xüsusi xidmət orqanlarından əldə edilmiş gizli sənədləri yayıb.
TodayPress TV xəbər verir ki, sənədlərdə Rusiyanın Ermənistan Baş naziri Nikol Paşinyanı rusiyalı oliqarx Samvel Karapetyanla əvəz etmək planı ətraflı şəkildə təsvir olunur.
Sızdırılmış materiallarda açıq şəkildə qeyd edilir ki, "Karapetyanın erməni İvanişvili olmaq üçün hər cür şansı var" və "2012-ci ildə Gürcüstanda həyata keçirilmiş eyni ssenarinin tətbiqi vacibdir".
Sənədlərə görə, Rusiya tərəfi Karapetyanı "üçüncü qüvvə" kimi ön plana çıxararaq müxalifət sahəsini birləşdirmək və Paşinyanın hakimiyyətini devirmək niyyətindədir.
"The Insider" və digər müstəqil rus araşdırma nəşrlərinin yaydığı məlumatlara əsasən, sənədlər Rusiya kəşfiyyatının Ermənistandakı şəbəkəsini, o cümlədən Karapetyanın FSB ilə əlaqələrini əks etdirir.
Plana uyğun olaraq, Karapetyanın rəhbərlik etdiyi "Güclü Ermənistan" partiyası və digər müxalif qüvvələr vasitəsilə seçkilərdə Paşinyana qarşı böyük koalisiya formalaşdırılması nəzərdə tutulur.
Bu ifşalar Ermənistanda siyasi gərginliyi daha da artırır. Nikol Paşinyan və onun komandası Rusiyanı ölkə daxilində "hibrid əməliyyat" aparmaqda ittiham edir, Karapetyan tərəfdarları isə ittihamları rədd edir.
Jalə Rövşən
