İsrail kəşfiyyatından şok iddia: İran minlərlə sentrifuqanı dağların altına köçürdü
İsrail kəşfiyyatı İranın ötən ilin payızında uranın zənginləşdirilməsi üçün istifadə olunan minlərlə sentrifuqanı Pikaks dağı altındakı yeni yeraltı kompleksə köçürdüyünü iddia edir.
TodayPress TV xəbər verir ki, "The Wall Street Journal" İsrail və ABŞ rəsmilərinə istinadən məlumat yayıb.
Məlumata görə, İsrail bu kəşfiyyat məlumatlarını ABŞ-a təqdim edib. Bildirilir ki, sentrifuqalar 2025-ci ilin iyununda ABŞ və İsrailin Natanz, Fordo və İsfahandakı nüvə obyektlərinə endirdiyi zərbələrdən sonra yeni kompleksə daşınıb. Nəşr qeyd edir ki, bu məlumatlar İranın həmin obyektdə nüvə proqramını bərpa edə biləcəyi ilə bağlı narahatlığı artırıb.
Bildirilir ki, Pikaks dağı Natanz uran zənginləşdirmə zavodundan təxminən 1,5 kilometr məsafədə yerləşir və 2020-ci ildən inşa edilən yeraltı kompleks əvvəlki hava zərbələrindən zərər görməyib. Qayalıqların 100–150 metr dərinliyində yerləşən obyektin adi bunkerəleyhinə bombalara qarşı davamlı olduğu qeyd olunur.
Bundan başqa, Vaşinqtonda fəaliyyət göstərən Elm və Beynəlxalq Təhlükəsizlik İnstitutu (ISIS) yeni peyk görüntülərinin təhlilinə əsaslanaraq kompleks ərazisində tikinti işlərinin davam etdiyini açıqlayıb. Ekspertlərin fikrincə, İran uranın zənginləşdirilməsi üçün ehtiyat yeraltı obyekt yaratmaq istiqamətində fəaliyyətini davam etdirir.
