Gürcüstan və BMT 2026-2030 Əməkdaşlıq Çərçivəsini imzaladılar
Gürcüstan və Birləşmiş Millətlər Təşkilatı 2026-2030-cu illər üçün yeni BMT-nin Davamlı İnkişaf üzrə Əməkdaşlıq Çərçivəsi sənədini imzaladılar.
TodayPress TV xəbər verir ki, bu barədə Gürcüstan KİV məlumat yayıb.
Bildirilib ki, imzalanma mərasimi 9 dekabrda Tbilisinin Avlabari rayonundakı Gürcüstan Mərasim Sarayında keçirilib və mərasimdə Baş nazir İrakli Kobaxidze də daxil olmaqla, "Gürcü Arzusu" nazirləri, diplomatik nümayəndəliklərin üzvləri və BMT rəsmiləri iştirak edib.
Mərasimi açan İrakli Kobaxidze bildirib ki, yeni beş illik çərçivə sazişi “gələcək əməkdaşlıq” üçün təməl qoyur və Gürcüstanın “milli prioritetlərinə” əsaslanır.
O, əsas istiqamətlərin şəhər yaşayış məntəqələri və regionlar arasında bərabərsizliyi azaltmaq, mərkəzləşdirilməmiş idarəetməni əhəmiyyətli dərəcədə təşviq etmək, insan hüquqlarının qorunması standartlarını gücləndirmək, inklüziv sosial müdafiə və təhsil sistemlərinin inkişafını dəstəkləmək istəklərinə uyğun olduğunu vurğulayıb.
“Dünya ciddi çətinliklərlə üzləşməyə davam edir. Qlobal iqtisadi və geosiyasi çətinliklərə baxmayaraq, ölkəmiz illər ərzində artıq yalnız yardım alan deyil, həm də etibarlı və nümunəvi tərəfdaş olan bir dövlətə çevrilib. Bu, sülhə yönəlmiş ardıcıl islahatlar və siyasət sayəsində mümkün olub”, - deyə baş nazir bildirib.
Aysel Mətləb
