Yolunu tapdılar: Repetitorluq bitir
"Azərbaycanda erkən yaşlardan repetitor və hazırlıq kurslarına yönləndirmənin əsas səbəblərindən biri mövcud təhsil sistemidir".
TodayPress TV xəbər verir ki, bu fikirləri təhsil eksperti Ramin Nurəliyev bildirib.
O hesab edir ki, problemin həlli üçün təhsil sistemində köklü dəyişikliklərə ehtiyac var:
"Bu istiqamətdə, xüsusilə də təhsil sisteminin dəyişdirilməsi zəruridir. Nə qədər müxtəlif düzəlişlər və yanaşmalar tətbiq olunsa da, ümumi müsbət nəticələrin əldə olunmasında müəyyən çətinliklər qalacaq. Lakin təhsil sistemi dəyişdirilərsə və üç pilləyə - ibtidai təhsil, doqquzuncu sinfə qədər icbari təhsil və sonrakı mərhələdə ali təhsilə hazırlıq mərhələsinə bölünərsə, bu daha faydalı ola bilər".
Ekspertin sözlərinə görə, hazırkı sistemdə məktəb məzunları ali məktəblərə qəbul üçün tələb olunan proqramı tam mənimsəyə bilmirlər:
"Hazırda 11-ci sinfə çatan bir şagird Azərbaycan dili və ya riyaziyyat üzrə ümumi qəbul proqramının cəmi 5-10 faizini mənimsəmiş olur. Buna görə də o, məcbur qalır ki, repetitor yanına getsin və ya hazırlıq kurslarına müraciət etsin. Yeni model tətbiq edilərsə, 10-cu sinifdən etibarən şagirdlərin ali təhsilə hazırlığı daha sistemli şəkildə təşkil oluna bilər. Bu prosesə yüksək nəticə göstərmiş müəllimlərin cəlb olunması da effektiv nəticələr verə bilər. Qəbul imtahanları ətrafında formalaşan psixoloji təzyiq valideynlərin uşaqları erkən yaşlardan hazırlıq prosesinə yönləndirməsinə səbəb olur. Hazırda qəbul imtahanı ilə bağlı qorxu və fobiya həm valideynlər, həm də şagirdlər arasında kifayət qədər yüksək səviyyədədir. Buna görə də müşahidə edirik ki, şagirdlər hələ aşağı siniflərdən etibarən valideynləri tərəfindən hazırlıq prosesinə yönləndirilirlər".
R.Nurəliyev əlavə edib ki, qəbul imtahanlarının sadələşdirilməsi və fənn sayının azaldılması da mövcud problemin həllinə müsbət təsir göstərə bilər:
"Qəbul imtahanları çətinləşdikcə, bu qorxu və narahatlıq daha da artır. Ona görə də hesab edirəm ki, həm qəbul imtahanlarının müəyyən qədər sadələşdirilməsi, həm fənn sayının azaldılması, həm də təhsil sistemində aparılacaq dəyişikliklər bu problemin həllinə müsbət təsir göstərə bilər", - deyə o, fikrini tamamlayıb.
Türkan İsgəndərli
