DİQQƏT! Sahibkarlara ŞAD XƏBƏR
“Vergi Məcəlləsinə edilən dəyişikliklər vergi nəzarətində yeni mərhələnin başlanğıcıdır və bu proses sahibkarlar üçün daha şəffaf və proqnozlaşdırılan mühit formalaşdırır”.
TodayPress TV xəbər verir ki, bunu Milli Məclisin deputatı Vüqar Bayramov deyib.
Deputat bildirib ki, 2026-cı ildən etibarən Azərbaycanda “üfüqi monitorinq” mexanizminin tətbiqinə start verilib. Yeni sistem vergi ödəyicilərinə mövcud vergi risklərini əvvəlcədən vergi orqanına açıqlamaq imkanı yaradır ki, bu da səyyar vergi yoxlamalarının yalnız istisna hallarda aparılmasına şərait yaradacaq.
Vüqar Bayramovun sözlərinə görə, praktik olaraq bu dəyişikliklər səyyar vergi yoxlamalarının sayını daha da minimuma endirəcək:
“Son illərin statistikası da bunu təsdiqləyir. Belə ki, 2024-cü ildə 800 mindən çox aktiv vergi ödəyicisinə münasibətdə cəmi 384 səyyar vergi yoxlaması aparılıb. Bu göstərici 2023-cü illə müqayisədə 29 faiz, 2018-ci illə müqayisədə isə təxminən 5 dəfə azdır”.
Parlamentari vurğulayıb ki, “üfüqi monitorinq”in ən mühüm üstünlüklərindən biri maliyyə sanksiyalarına yeni yanaşmanın tətbiq edilməsidir:
“Əgər vergi ödəyicisi mövcud riskləri əvvəlcədən vergi orqanına açıqlayırsa, həmin hallarda maliyyə sanksiyası tətbiq edilməyəcək. Yalnız açıqlanmayan risklər sonradan vergi orqanı tərəfindən aşkar edildiyi halda 25 faiz maliyyə sanksiyası nəzərdə tutulur”.
Vüqar Bayramov qeyd edib ki, “üfüqi monitorinq” çərçivəsində təqdim edilən məlumatlar vergi orqanları tərəfindən elektron formada izləniləcək. Sistem əvvəlcədən məsləhətləşmə mexanizmi əsasında qurulduğu üçün vergi risklərinin azaldılmasına xidmət edir.
Deputatın sözlərinə görə, yeni mexanizm maliyyə intizamının gücləndirilməsinə və korporativ idarəetmənin yaxşılaşdırılmasına da mühüm töhfə verəcək:
“Bu sistemə qoşulan sahibkarlara əsas vəsaitlər üzrə amortizasiyanı azalan qalıq və ya düz xətt metodu ilə hesablamaq seçimi təqdim olunur ki, bu da vergi planlaşdırılması baxımından əlavə üstünlüklər yaradır”.
Vüqar Bayramov əlavə edib ki, avtomatlaşdırılmış uçot aparan və daxili nəzarət sistemini tətbiq edən orta və iri sahibkarlıq subyektləri “üfüqi monitorinq”ə qoşula bilərlər. Bu mexanizm eyni zamanda vergi orqanları ilə sahibkarlar arasında şəffaf və etibarlı əməkdaşlıq modelinin formalaşmasına xidmət edir.
Millət vəkili hesab edir ki, yeni yanaşma vergi nəzarətində cərimə əsaslı modeldən məsləhət və qabaqlayıcı idarəetmə modelinə keçidin göstəricisidir və biznes mühitinin daha da yaxşılaşmasına imkan verəcək.
Qiymət Mahir
