Abşeronda torpaq sahələri niyə boşaldılır? - AÇIQLAMA
Abşeron rayonunun Məmmədli kəndində, Həsənbəy Ağayev və Ziya Bünyadov küçələrində, “Yanar dağ” Dövlət Tarix-Mədəniyyət və Təbiət Qoruğuna yaxın böyük bir ərazi metan qazı (CH4) aşkar edildiyi üçün plana düşüb.
Məlumata görə plana düşən ərazilərdə hər sota görə sakinlərə yüksək məbləğdə kompensasiya ödənilməsi nəzərdə tutulub.
Məsələ ilə bağlı əmlak eksperti Ramil Osmanlı TodayPress TV-yə bildirib ki, əgər konkret faktlar və müvafiq rəsmi qurumlar tərəfindən təsdiqlənmiş təhlükə mövcuddursa, dövlətin belə addımlar atması tamamilə əsaslıdır.
Onun sözlərinə görə, bu kimi hallarda əsas məqsəd vətəndaşların təhlükəsizliyinin, sağlamlığının və ekoloji tarazlığın qorunmasıdır:
"Əgər ərazidə metan qazının mövcudluğu insan həyatı üçün risk yaradırsa, dövlət vətəndaşların təhlükəsizliyini nəzərə alaraq həmin zonanı yaşayış üçün məhdudlaşdıra və ya tamamilə boşalda bilər. Bu, həm ekoloji, həm də sosial baxımdan normal və zəruri addımdır".
Ekspert kompensasiya məsələsinə də toxunaraq bildirib ki, dövlət ehtiyacları üçün ərazilər alınarkən əsas prioritet vətəndaşların sosial müdafiəsidir:
"Hökumətin məqsədi insanların evsiz qalmasının qarşısını almaq və ödənilən kompensasiya hesabına onların alternativ yaşayış şəraitini təmin etməsinə imkan yaratmaqdır. Kompensasiyanın yüksək və ya aşağı olması subyektiv qiymətləndirmədir və bu, rəsmi prosedurlar əsasında müəyyən edilir. Bu cür hallarda söküntü işlərinə başlanmazdan əvvəl mütləq şəkildə müstəqil qiymətləndiricilər cəlb olunur. Qiymətləndiricilər layihəyə düşən əmlakları – torpaq sahələrini, fərdi yaşayış evlərini və digər tikililəri bazar dəyərinə uyğun qiymətləndirirlər. Kompensasiya məbləğləri də məhz bu qiymətləndirmənin nəticələrinə əsasən müəyyən edilir".
Ramin Osmanlı əlavə edib ki, dövlət eyni zamanda büdcə vəsaitlərinin səmərəli və düzgün xərclənməsinə xüsusi nəzarət edir. O qeyd edib ki, kompensasiya ödənişləri müxtəlif dövlət qurumlarının nəzarəti altında həyata keçirilir və bu proses şəffaflıq prinsiplərinə uyğun aparılmalıdır:
"Abşeron yarımadasında geoloji xüsusiyyətlərə görə bu tip riskli ərazilərin olması istisna edilmir və gələcəkdə oxşar hallarla başqa yaşayış məntəqələrində də rastlaşmaq mümkündür. Lakin hər bir ərazi üzrə qərar fərdi qaydada, aparılan araşdırmalar və rəsmi rəy əsasında qəbul olunmalıdır".
Qeyd edək ki, hazırda Məmmədli kəndində plana salınması nəzərdə tutulan ərazilərlə bağlı rəsmi qurumlar tərəfindən yekun qərar və dəqiq kompensasiya mexanizmi açıqlanmayıb.
Türkan İsgəndərli
