“20 Yanvar”ın taleyi dəyişir? - Bir müddət sonra yenə eyni problem yaranacaq

Bakıda illərdir sürücülərin ən çox şikayət etdiyi problemlərdən biri nəqliyyat sıxlığıdır. Xüsusilə Binəqədi şosesi, “20 Yanvar” dairəsi və Ziya Bünyadov prospektində günün pik saatlarında yaranan tıxaclar hərəkətin ləngiməsinə və vaxt itkisinə səbəb olur. AYNA-nın təqdim etdiyi yeni layihəyə əsasən, Mehdiabad–Baksol–Ziya Bünyadov prospektində yeni avtomobil yolu salınacaq. Yeni layihənin tıxac probleminə qarşı nə qədər effektiv olacağı cəmiyyətdə sual doğurub. 

Mövzu ilə bağlı nəqliyyat eksperti Adil Nəbiyev TodayPress TV-yə açıqlama verib.

Ekspert bildirir ki, Mehdiabad–Baksol–Ziya Bünyadov prospekti avtomobil yolu layihəsi Bakının nəqliyyat sistemində uzun illərdir hiss olunan şimal-qərb–şərq əlaqəsinin gücləndirilməsi baxımından mühüm əhəmiyyət daşıyır. Hazırda Mehdiabad, Masazır, Novxanı, Binəqədi və digər ətraf yaşayış məntəqələrindən şəhərin şərq və cənub-şərq istiqamətlərinə hərəkət edən nəqliyyat vasitələrinin böyük hissəsi Binəqədi şosesi, “20 Yanvar” dairəsi və Ziya Bünyadov prospekti üzərindən hərəkət etməyə məcbur olur. Bu isə xüsusilə səhər və axşam pik saatlarında həmin istiqamətlərdə ciddi sıxlıqlar yaradır.

Onun fikrinə görə, yeni yolun əsas üstünlüyü ondan ibarətdir ki, nəqliyyat axınları üçün alternativ marşrut formalaşdıracaq və mövcud magistrallara düşən yükün bir hissəsini öz üzərinə götürəcək. Nəticədə Binəqədi şosesi və “20 Yanvar” qovşağından istifadə edən sürücülərin bir qismi yeni marşruta yönələcək ki, bu da ilk mərhələdə nəqliyyat sıxlığının azalmasına səbəb ola bilər. Xüsusilə yük avtomobilləri və şəhər mərkəzinə daxil olmadan digər istiqamətlərə keçmək istəyən sürücülər üçün yeni yol daha əlverişli alternativ olacaq.

Adil Nəbiyev qeyd edir ki, bununla yanaşı, nəqliyyat planlaşdırılması sahəsində qəbul olunmuş bir anlayış var – “induksiya olunmuş tələbat” prinsipi. Dünya təcrübəsi göstərir ki, yeni yollar istifadəyə verildikdən sonra hərəkət rahatlaşdığı üçün insanlar daha çox şəxsi avtomobildən istifadə etməyə başlayırlar. Əvvəllər ictimai nəqliyyata üstünlük verən və ya səfərlərini məhdudlaşdıran bəzi şəxslər də yeni yolun yaratdığı rahatlıqdan istifadə edirlər. Nəticədə müəyyən müddətdən sonra həmin marşrutda da nəqliyyat axını artır və yol yenidən yüklənə bilir.

Ekspertin sözlərinə görə, bu baxımdan yeni yolun uzunmüddətli effektivliyi yalnız onun tikintisi ilə ölçülməməlidir. Layihə ictimai nəqliyyatın inkişafı, tramvay və ya digər relsli nəqliyyat sistemlərinin qurulması, park-et-davam et (Park&Ride) infrastrukturu, ağıllı nəqliyyat sistemləri və parklanma siyasəti ilə paralel şəkildə həyata keçirildiyi halda daha dayanıqlı nəticə verə bilər. Əks halda yeni yol mövcud sıxlığı azaltmaqla yanaşı, gələcəkdə əlavə avtomobil axını cəlb edərək özü də yüklənə bilər.

Həmçinin “Müsbət məqamlardan biri də odur ki, layihədə gələcək ictimai nəqliyyat həlləri üçün infrastruktur ehtiyatlarının nəzərə alınması planlaşdırılır. Bu yanaşma gələcəkdə həmin dəhlizin yalnız avtomobillər üçün deyil, daha çox sərnişin daşıyan nəqliyyat növləri üçün də istifadə edilməsinə imkan yarada bilər.

Ümumilikdə hesab edirəm ki, Mehdiabad–Baksol–Ziya Bünyadov prospekti yolu ilk mərhələdə Binəqədi şosesi, “20 Yanvar” dairəsi və Ziya Bünyadov prospektindəki sıxlığın azalmasına müsbət təsir göstərəcək. Lakin uzunmüddətli perspektivdə tıxac probleminin həlli üçün yol tikintisi ilə yanaşı ictimai nəqliyyatın prioritetləşdirilməsi və nəqliyyatın kompleks idarə olunması tədbirləri də mütləq şəkildə həyata keçirilməlidir”, - deyə, Adil Nəbiyev bildirib.

Xanım Musayeva

TodayPress TV