XIII Bakı Qlobal Forumu çərçivəsində panel müzakirə keçirildi
Bu gün XIII Bakı Qlobal Forumu çərçivəsində “Qlobal Təhlükəsizlik və Güc Balansı: Beynəlxalq Hüquqa Hörmət, Yeni Məsələlər, Yeni Çağırışlar” adlı panel müzakirəsi keçirilib.
TodayPress TV xəbər verir ki, panel müzakirəsində çıxışçılar mövzu ilə bağlı fikirlərini bölüşüb.
Belçikanın keçmiş Baş naziri, Avropa İttifaqı Şurasının sabiq prezidenti Şarl Mişel diqqətə çatdırıb ki, Aİ-nin söykəndiyi bütün prinsiplər dağılmaqdadır, beynəlxalq hüquq hər gün təhdidə və təcavüzə məruz qalır: “Strateji alternativlər əsasında düşünülməli, qərarlar verilməlidir. ABŞ-la strateji ittifaq dəyişir, Aİ daha müstəqil qərarlar qəbul etməlidir. Yaxın Şərqdəki vəziyyət, Venesuela, Qrenlandiya ilə bağlı fikir ayrılıqlarını görürük. Aİ ölkələri təhlükəsizlik və müdafiə sahəsində vəziyyəti düzəltməlidir, etibarlı tərəfdaşlıqlar qurulmalıdır. Vaxtilə Rusiyanın mədən yanacağından və Çinin ucuz mallarından asılı idik, düşünürəm bu vəziyyət bitib”.
Misirin keçmiş xarici işlər naziri, Ərəb Dövlətləri Liqasının sabiq Baş katibi Əmr Musa isə qlobal təhlükəsizliyə təhdidlərdən bəhs edib və vəziyyətin dəyişməli olduğunu bəyan edib: “Qlobal təhlükəsizlik ötən illərdə qlobal supergüclər tərəfindən müəyyən edilirdi, bu, belə davam edə bilməz. Qlobal Şimal və Qlobal Cənub arasında uçurum var”.
Avstriyanın sabiq Kansleri Sebastian Kurtsun sözlərinə görə, BMT-nin zəruriliyinə dəlalət edən amillər hamı üçün qəbul edilir, lakin BMT getdikcə köhnəlir və təsir gücünü itirir.
Avstriyanın sabiq Kansleri Alfred Quzenbauer qeyd edib ki, artıq Qərbə sırf liberal demokratiyanın keşiyində dayanan məkan kimi baxa bilmirlər, burada sadəcə Avropa İttifaqı qalıb.
Norveçin sabiq Baş naziri Kyell Magne Bondevik deyib ki, Avropa İttifaqı artıq tək qalıb, ABŞ tutduğu mövqelərdən, təşkilatlardan geri çəkilir: “Bu da təbii olaraq Avropanın bu gün daha çox həmrəy olmasına gətirib çıxarıb. Çünki tək qalmışıq. Düşünürəm ki, gələcəkdə regional təşkilatlar qlobal təşkilatlardan daha böyük rol oynayacaq - xüsusən də təhlükəsizlik məsələsində”.
