Quterreşdən ABŞ, İsrail və İrana döyüş əməliyyatları ilə bağlı çağırış
BMT-nin Baş katibi Antonio Quterreş ABŞ, İsrail və İranı hərbi əməliyyatları dərhal dayandırmağa və diplomatiyaya qayıtmağa çağırıb.
TodayPress TV xəbər verir ki, bu barədə o, Nyu-Yorkda jurnalistlərə bildirib.
Baş katibin sözlərinə görə, ABŞ və İsrailin miqyaslı insan əzablarına gətirib çıxaran və artıq ciddi iqtisadi nəticələr doğuran hərbi əməliyyatları dayandırmağının vaxtı çoxdan çatıb. O, həmçinin İranı qonşu dövlətlərə hücumlardan imtina etməyə çağırıb.
Quterreş vurğulayıb ki, münaqişələr öz-özünə başa çatmır - onlar yalnız liderlər dağıntı əvəzinə dialoqu seçdikdə bitir: "Bu seçim hələ də mövcuddur və o, məhz indi edilməlidir".
BMT-nin Baş katibi həmçinin bildirib ki, münaqişənin bütün tərəfləri ilə əlaqələri saxlamaq üçün özünün şəxsi elçisi Jan Arnonu regiona göndərib.
O, dünyanın bütün Yaxın Şərqi əhatə edə biləcək və qlobal nəticələri olacaq daha genişmiqyaslı müharibənin astanasında olduğunu qeyd edərək, sonrakı eskalasiya riski barədə xəbərdarlıq edib.
"Biz bütün dünya üzrə dramatik nəticələrlə Yaxın Şərqi əhatə edəcək daha genişmiqyaslı müharibənin astanasındayıq. Münaqişə artıq hər yerdə hiss olunur. Gəmiçilik azadlığının bloklanmasının nəticələrinə baxmaq kifayətdir", - Quterreş deyib.
