Məşhur yunandan üsyan: Ay cahillər, Türkiyəni savaşda yenəcəyinizə necə inana bilərsiniz?
“Türkiyəyə qarşı müharibə elan edib, bu müharibədə qalib gələcəyimizə inanan cahillər çoxdur”.
TodayPress TV xəbər verir ki, bunu Güney Kiprdə yaşayan sosial elmlər üzrə yazıçı Giorgos Koumoullis deyib.
O, bir çox kiprli rumun keyfiyyətli təhsildən məhrum olduğu üçün cahil qaldığını vurğulayıb.
Baş yepiskop və irqçi ELAM kimi digər mühafizəkar qüvvələrin kiprli türkləri azlıq statusuna salmaq üçün vahid dövlət tələb etdiyini qeyd edən yazar, “Bunun mənası müharibədir” deyib.
“Aşırı sağçı cahillər, Rum ordusunu ən müasir silahlarla gücləndirsək, Şimali Kipri Türkiyədən azad edə biləcəyimizi düşünürlər. Türk ordusunun dünyanın ən güclü ordularından biri olması və NATO-nun ikinci böyük ordusu olması onlar üçün əhəmiyyətsiz detal sayılır”, – deyə Koumoullis ironiya ilə əlavə edib.
Yazar ironik şəkildə davam edərək bildirib: “Kim bilir, bəlkə də ELAMçılar nüvə silahına malikdirlər və Türkiyəyə “torpaqlarımızı boşaldın, yoxsa bütün ölkənizi radioaktiv toza çevirərik” ultimatumu verəcəklər”.
Koumoullis vurğulayıb ki, bir çox kiprli rum keyfiyyətli təhsil almadığı üçün dəstəklədiyi partiyanın həqiqi niyyətlərini və nəticələrini görmür. ELAM Kipr probleminə həll olaraq unitar dövləti müdafiə edir. İndiki ikitoplumlu dövləti ləğv edib kiprli türkləri icma statusundan azlıq statusuna endirmək istəyir.
“Bir insan – bir səs” prinsipi ilə rumların hər zaman üstün olmasını hədəfləyən bu yanaşmanın nəticədə müharibəyə aparacağını bildirən Koumoullis, ELAM seçicilərinin cahilliyinin onları öz arzu və maraqlarına zidd mövqeləri dəstəkləməyə məcbur etdiyini qeyd edib.
Qeyd edək ki, o, bu fikirləri GKRY-də (Güney Kıbrıs) son həftələrdə əhəmiyyətli dərəcədə qızışan hərbi gərginlik fonunda səsləndirib. Əsas tətikləyici hadisə iyunun 8-də Fransa ilə GKRY arasında imzalanan “Kuvvetlərin Statusu Sazişi” (SOFA) oldu. Bu saziş Fransa qoşunlarının Kiprdə yerləşməsinə, birgə təlimlərə və hərbi əməkdaşlığa hüquqi baza yaradır.
Türkiyə Prezidenti Rəcəb Tayyib Ərdoğan bu məsələyə münasibət bildirərək deyib: “İndi Aralıq dənizində, xüsusilə də Kıbrıs adasında fitnə ocağı yandırmaq cəhdi görürük və hadisələri çox yaxından izləyirik. Heç kim macəra arxasınca qaçmasın. Əgər Cənub Aralıq dənizində Türkiyənin və Kıbrıs türkünün hüquq və qanunlarına qəsd edilərsə, bilin ki, cavabımız çox net olacaq, çox da sərt olacaq.”
Bu bəyanatdan sonra Türkiyə Müdafiə Nazirliyi də sazişi “1960 sazişlərinin pozulması və beynəlxalq hüquqa zidd” adlandırıb və “Türk Silahlı Qüvvələri Kıbrıs türkünün təhlükəsizliyinə qarşı hər hansı düşmən hərəkətə ən sərt cavabı verməyə qadir və qətiyyətlidir” deyə xəbərdarlıq edib.
Jalə Rövşən
