Makron: "İranda hakimiyyətin zorla dəyişdirilməsi strateji səhvdir"

Fransa prezidenti Emmanuel Makron bildirib ki, İranda hakimiyyəti kənardan zorla dəyişmək cəhdi strateji səhv olar. 

TodayPress TV xəbər verir ki, o, bu fikrini Kanadada keçirilən G7 sammiti çərçivəsində səsləndirib. 

Makronun sözlərinə görə, bir ölkəyə xaricdən hərbi müdaxilə və ya zorla təsir etməklə onu xilas etmək mümkün deyil və bu cür düşüncə tarixi təcrübəyə ziddir.

Fransa lideri İsrail və İran arasında davam edən hərbi münaqişəyə toxunaraq hər iki tərəfi enerji infrastrukturu, inzibati obyektlər və mülki şəxsləri hədəf alan hücumlardan çəkinməyə çağırıb.

Xatırladaq ki, iyunun 13-nə keçən gecə İsrail İranın nüvə və hərbi obyektlərinə hücum edib. İran isə cavab olaraq İsrailə raketlər atıb. Hazırda İran və İsrail arasında qarşılıqlı zərbələr davam edir.

Türkan İsgəndərli