İvett Kuper Britaniya xarici işlər naziri təyin edildi
Keçmiş daxili işlər naziri İvett Kuper xarici işlər naziri təyin edilib.
TodayPress TV xəbər verir ki, bu barədə Böyük Britaniyanın baş naziri Kir Starmerin ofisi məlumat yayıb.
"Möhtərəm İvett Kuper xarici işlər, Birlik və İnkişaf Məsələləri üzrə nazir vəzifəsinə təyin edilib", - bəyanatda deyilir.
56 yaşlı Kuper Baş nazirin müavini və ədliyyə naziri təyin edilmiş xarici işlər naziri Devid Lemmini əvəz edib.
Boş qalan daxili işlər naziri postunu isə əvvəllər Ədliyyə Nazirliyinə rəhbərlik etmiş Şabana Mahmud tutub.
Qeyd edək ki, Kuper Starmerin kabinetində ən təcrübəli siyasətçilərdən biridir. O, həmçinin 2008-2009-cu illərdə Qordon Braunun hökumətində maliyyə nazirinin müavini, 2009-2010-cu illərdə isə əmək və pensiya naziri vəzifələrində çalışıb.
