"İrandan sonra növbə Kubanındır" - Trampın yeni hədəfi bəlli oldu
ABŞ Prezidenti Donald Tramp iki ölkə arasında gərginliyin artdığı bir dövrdə Kubanı "yaxın zamanda idarəçiliyini təhvil alacaqları" bir yer kimi təsvir edib.
TodayPress TV xəbər verir ki, bu barədə "Fox News" məlumat yayıb.
Bildirilib ki, Tramp Florida ştatında etdiyi çıxışında Kuba ilə bağlı zarafat xarakterli olduğu ehtimal edilən bəyanatlar səsləndirib.
Kubanı "qısa müddətdə rəhbərliyi ələ keçirəcəkləri" bir yer kimi nitqləndirən Tramp, adanın problemləri olduğunu müdafiə edib və aşağıdakı ifadələri işlədib:
"İrandan qayıdarkən aviadaşıyıcılarımızdan bəlkə də biri, “USS Abraham Lincoln” sahil yaxınlığında lövbər salacaq və onlar (kubalılar - red.) “Çox sağ olun, təslim oluruq” deyəcəklər”.
Prezidentin çıxışı zamanı salonda gülüşmələr eşidilsə də, Ağ Ev bu ifadələrin ciddi olub-olmadığına dair hələlik heç bir rəsmi açıqlama verməyib.
Xatırladaq ki, Amerika lideri aprelin 13-də verdiyi bəyanatda İran gündəmindən sonra Kuba məsələsi ilə də maraqlanacaqlarını qeyd etmişdi:
"Kuba fərqli bir hekayədir. Orası illərdir dəhşətli şəkildə idarə olunur. İrandan sonra ora baxa bilərik".
Kuba Dövlət Başçısı Migel Diaz-Kanel isə mümkün ABŞ müdaxiləsi ilə bağlı bildirib:
"Əgər bu baş verərsə, münaqişə olar, mübarizə olar, özümüzü müdafiə edərik və əgər ölməyimiz lazımdırsa, ölərik".
Aysel Mətləb
