İran Münaqişəsi: BƏƏ niyə hədəfə alındı?
İrana qarşı müharibənin başlanmasından bəri Birləşmiş Ərəb Əmirlikləri (BƏƏ) ərazisinə 1700-dən çox raket və dron atılıb. Hücumların 90%-dən çoxu tutucu raketlər, qırıcı təyyarələr və helikopterlər tərəfindən zərərsizləşdirilib.
TodayPress TV xəbər verir ki, bu barədə ABŞ Prezidenti Donald Tramp "CNN"ə müsahibəsində bildirib.
Onun sözlərinə görə, münaqişə zamanı onun üçün ən böyük sürpriz İranın qonşu ərəb ölkələrinə zərbələr endirməsi olub.
İranın İslam İnqilabı Keşikçiləri Korpusu (İİKK) isə bazar günü açıqlayıb ki, hücumların təxminən 60%-i qonşu ərəb ölkələrindəki ABŞ bazalarına və strateji maraqlara, qalan hissəsi isə İsrailə qarşı yönəldilib.
Niyə Dubay Hədəf Alındı?
Məlumata görə, hücumların əsas hədəflərindən biri Dubay olub. Raketlərin bəzisi yaşayış binalarına, ofislərə və yollara düşüb, nəticədə dörd mülki şəxs həyatını itirib.
Professorlar qeyd ediblər ki, Dubay qlobal iqtisadi sistemin mühüm mərkəzlərindən biridir və İran liderləri onu Qərb iqtisadiyyatının əsas dayaqlarından biri kimi görürlər. Buna görə də şəhərə hücumlar yalnız BƏƏ üçün deyil, qlobal iqtisadiyyat üçün də psixoloji təsir yaradır.
İran və BƏƏ Arasında İqtisadi Əlaqələr
Buna baxmayaraq, İran uzun illərdir BƏƏ-ni iqtisadi dayaq kimi görür. Sanksiyalara baxmayaraq iki ölkə arasında ticarət əlaqələri davam edib. Ümumdünya Ticarət Təşkilatının məlumatına görə, 2024-cü ildə iki ölkə arasında ticarət dövriyyəsi 28 milyard dollar olub.
Hücumların Səbəbləri
Analitiklərə görə, İranın BƏƏ-ni hədəf almasının səbəblərindən biri ölkənin ABŞ ilə strateji müttəfiqliyidir. ABŞ tərəfindən “əsas müdafiə tərəfdaşı” kimi tanınan BƏƏ ABŞ istehsalı olan qırıcılar və hava hücumundan müdafiə sistemlərinə milyardlarla dollar sərmayə yatırıb.
Bundan başqa, İranla BƏƏ arasında məsafənin cəmi təxminən 100 km olması ölkəni raket və dron hücumları üçün daha asan hədəfə çevirir.
BƏƏ-nin Reaksiyası
BƏƏ prezidenti Mohammed bin Zayed Al Nahyan hücum qurbanlarını ziyarət edərək bildirib: “BƏƏ-nin görünüşü sizi aldatmasın. Biz asan ov deyilik.”
Müharibəyə baxmayaraq, Dubayda həyat davam edir. Turistlər və yerli sakinlər münaqişənin gündəlik həyatlarını tam dəyişdirməsinə imkan verməməyə çalışırlar.
Türkan İsgəndərli
